Néna tout sort kalité zoizo dann la natir. In pé i voltiz apré i poz. In pé i plane mé momandoné zot i trouv in plas pou pozé. Néna in pé i sort in péi i sava dann in n’ot péi é zot fé kilomète par dsi kilomète. Kondor i dor dann syèl konm Leconte de Lisle i di. Zoizo d’ mèr, pou son par, li plane dan lé z’èr épi momandoné li asiz dsi d’lo. Nou mèm, zonm avèk fanm, zot i koné ni bouj in bonpé dann nout vi. Nou lé toultan apré rode d’ot shoz, ni vé alé l’ot koté, épi l’ot koté d’lot koté. Ziskakan ? Ziska l’èr ni déside artourn shé nou é sa sé in l’anvi ni vien pa bou alé kont.I di pa : « éré ki konm Uliss la fé in bo voiyaz... épi la rotourn avèk son laz épi son rézon viv an parmi son famiy lo réstann son laz ». Konm zot i konpran la pa arienk Uliss la fé sa. Nout tout plizoumoin va fé sa in zour. Alé ! Mi kite azot rofléshi la dsi é ni artrouv pli d’van. Sipétadyé !