Mé zami, konm zot i koné, La Rényon lé dann in movèz pass. Lo virus i sirkil an vitèss é plizanpli vite. Tout sak lo moun I fé, I fé sirkil ali ankor pli vite… Nou lété bonpé pou dir : ”Tansyon ! Pangar” pars san z’ète sipèrkonésèr dann in v irus pèrsone téi koné pa arien, nou téi san, nou téi présan fason l’éta é l’éta lokal té apré fé, sa téi doi amenn anou dann malizé. Néna mèm in pé la manifèsté kont sa épi la domann fèrm la port Zilo.

La pa fèrmé, la rouvèr gran pars pou gouvèrnman épi son bann roprézantan, shèf sèrvis épi tout sak i s’ansui, téi falé pans lo lékonomi « néokolonyal ? » avan tout. La propagann ofisyèl téi pans sirtou mète la fote dsi nou rényoné. Zot la pa fé si ! zot la fé la ! zot i anfou lo bann zèss baryèr ! Zot i sousyé mèm pa zot lintéré prop. Biensir, an parmi nou mèm néna in bon pé la rant dann trin : zot té i oi demoun i mète pa mask partou ! Zot téi oi demoun kolé inn avèk l’ot pou pa réspèk lo lékar k’i fo réspèkté. Final de kont par la fote la désizyon l’éta épi son bann konplis « otoktone », ala nou lé an plin dann la tablatir d’ kovid 19.

Pars si mi kroi lo diréktèr l’OMS, néna poin arien lé pli inkonsékan ké rouv l’aéropor san pran lo bann mézir konm k’i fo. Mézami, ékout solman sak bann zékoutèr i di dann radyo. Akout azot ! zot i di zot la débark zilo san k’i domann azot arien, san k’i kon trol zot tanpératir, san pran zot l’adrèss é la plipar d’tan pèrsone la pa pran kontak avèk zot. Zot i kroi pa moin ? Zot na tor pars mi antann sa é plizyèr foi par zour. Lé vré la télé i ésplik aou i fé si, i fé la, i pran tèl prékosyoon mé rant sak i di é sak i fé néna in fosé téktonik. Ala pou kosa nou lé konmsa zordi !

Alé pa rode la fot kréol.A lé pa ! Promyé résponsab sé gouvèrnman avèk son bann larbin sir plas. Nou ? Nou lé sinploman, pri dann gob é pèrsone i vien pa bou tir anou ladan.