Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité,
Mi domann amoin kansa zot v’arète in kou avèk mésyé Didier : la pi in l’opozisyon, la pi in dézakor, sa i friz lo arsèlman. Sétaki i invant dé shoz pou mète baton dann son rou. Sétaki i déform dé shoz po an-nuir ali. Sétaki i kashyète déyèr bann z’institisyon pou rod lo pou avèk lo lant dann son tète. Poitan, li réponn azot poin pou poin. Poitan li donn azot lo lésplikasyon k’i fo mé zot lé pa la èk sa ; pou zot i fo bar son shomin pou n’inport ékèl pri. In lébzanp : lo tourism. I pé pa dir li débate pa pou mète sa anlèr mé kan k’i ariv in l’inkonvényan, l’èr-la i malédiksyone ali, kaziman… Si nana la kriz dann l’erop, sé kant mèm pa par la fote mésyé Didier. Si bann l’erop i sar pi an vakans la pa li l’otèr. Alor, siouplé, arète in pé avèk li, donn ali in kar d’èr d’pé. Tok ! Pran sa pou toi !

Justin la fé pou répons :.

Mon vyé matant k’i koz touzour la boush rouvèr,
vi koné, sanm pou moin, la pa arienk lo mank rézilta ké demoun i roprosh Didier Robert, sé sirtou ké son lang na poin lo zo. Dann son kozman, napoin la plas pou douté. Dann son kafé na poin triyaj. Kan li promète sis san mil touris, sé konmsi sa sé in bit lé fasil pou trapé avèk tout larzan li dépans. Sa li kont pa ! Pou li sa i sava donn in bon rézilta é kan i donn pa in bon rézilta, i mète l’otèr dsi la kriz, dsi sosi, dsi sola, mé zamé sé li la fote. Donk, apré troi z’ané, la pa sis san mil touris nana, mé solman kat san mil. Nana in gro diférans rant inn épi l’ot shif... avèk in gro dépans an plis. I paré dopi yèr nana partou dann La frans, dann kouloir métro, dann la gar, in pé partou bann mèm dan La Suis épi dann l’Almagn, gran zafish pou di dmoun vien vizit La Rényon. Pli pir, kréol i koné mèm pa konbien in kanpagn konmsa i kout… Mé in paké larzan, sa lé sir. Sa sé in n’afèr i sava foiré sa, mé an atandan larzan la fine dispers an fimé... Arzout èk sa, kan la kour bann kont i fé ali in romark, li anvoy fèr fout. In n’afèr konmsa i pé pa diré, in zour ou bien l’ot, moin lé sir, li va mord son doi. Tok ! Pran sa pou ou !

 Justin