In zour va dévoil son vérité !
In zour, konm Pinokyo, son né va ralonz plis k’in pé !

Mi souvien, dann in sobatkoz l’ané 2010, Paul Vergès l’avé di Didier Robert sé in sharjèr d’lo. Dépi tan-la, dé z’ané la fine pasé é li la pa shanjé konm moun, li lé plizanpli mantèr. Mèrkrodi soir, l’avé dsi Antenne Rényon in sobatkoz rant Gilbert Annette épi Didier Robert. Pou pa shanjé, pou fé konm lo pti prézidan épi son bann dalon i fé dan la Frans, mésyé Didier la kalkil mantèr in foi an plis.
Momandoné, li la done Sarkozy la paternité dsi bann z’akor Matignon.
Tout demoun i koné la pa vré, mé Didier, pétèt li la mazine lété Vergoz dovan li, Vergoz son vyé konplis, lo vyé trèt l’inyonn la gosh. Alé oir lété pa sa, épi Annette la rapèl ali, z’akor Matignon, sa sé Paul Vergès la sign sa avèk De Villepin, dann tan Sarkozy té pankor prézidan. Didier Promyé lété konm in kavalyé dézarsoné. L’èr-la, konm d’abitid, lo boug la larg in mansonz ankor pli gro. Ala ké li di, Konsèy réjyonal, dann tan Paul Vergès, la pa fé arien avèk l’arzan Matignon, sé pou sa li té blizé arnégosyé. Ni koné la vérité la dsi, ni koné galman la siprime tram-trin dan z’istoir-la. Ni koné la promèt dé mil l’otobis, é dé z’ané âpre, lo proze la pankor bien avansé. Mé ni koné bien la pa l’otobis va anpèsh lo koma sirkilatoir. La pa non pli in rout litoral sis voi va règ nout bann problèm sirkilasyon.
Lé vré é lé domaz, Annette, sanm pou moin, la pa tro vouli antèr ali. La pa tro vouli mèt son né dan son bann mansonzri. Pou kosa ? Pars lo boug i mérité vréman in zour kèlk’in i démont son bann mansonz épi son mank kapasité pou jéré. Zour-la v’arivé, é zour-la, moin lé pliské sir, konm Pinokyo, son né va ralonz plis k’in pé.

Justin