Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité,
Moin la ramas pou fé plézir aou, in pti fraz moin la antann dann kozman mésyé Didier. Li la trète lo dé list la gosh pou zéléksyon konm « la gosh katastrof » konm pou dir i ansèrv pa arien noirsi lo tablo konmsa. Lé vré la gosh-la, i èm noirsi lo tablo toultan.sé mèm lo l’éspor zot i profèr – mi pans sirtou sa lé vré pou la list Lo progré-Parti kominis rényoné. Alé oir la droite i gingn fé la par dé shoz. Malgré sak zot i di, la tèr i kontinyé tourné ! Non ? Tok, pran sa pou toi !

Justin la fé pou répons :

Mon vyé matant k’i koz touzour la boush rouvèr, konm d’abitid moin lé pa dakor avèk vou, kan vi pans i fo pa trouv la sityasion konm in vré katastrof. Poitan ! Ou i pans pa la sityasion bann plantèr sé in vré katastrof ? Vi pans pa ké lo to d’shomaj lé katastrofik ? Arzout èk sa bann zakor parténarya signé kont nou mé pa avèk nou ? Parl pi la santé bann vash ! Parl pi ankor lo eréshofman klimatik ! Si ou i arzout ankor avèk sa lo danzé pou l’anvironeman. Sa pou anparl solman La Rényon, pars si ou i dévir out ytète dsi bnn prob lèm lo mond, lé sir ou va mank somèy !
Ah ! Mi oi ou bien d’isi ! Ou lé anparmi sak i di kréol kan son bouzaron lé plin li sousyé pa tout bann problèm-la. Kan son boujaron lé vid, lé parèy, la pa bann problèm konm ni anparl ké va ranpli son vant ! Dakor mé pou nou kréol la pa solman i tib dizéstif, li na son konsyans é son sousi pou l’avnir. afors sou-z’éstim anou, tardra-viendra zot va konprann kèl koté brinjèl i sharj. Tok ! Pran sa pou ou !