Oté

« In zyé i vol mayi, l’ot i vèye gardien »

In kozman pou la rout

Justin / 27 out 2018

JPEG - 43.6 ko

Pli lontan k’mi rapèl l’avé touzour volèr dann bitasyon. Sa la pa komans zordi solman, konm i antann souvan dann radyo : i anparl volèr banane, volèr tomate, volèr létshi é total kapital. Biensir sak i fé vol son bien lé pa kontan é sa sé in n’afèr normal pars ou la travaye pou sa, ou la pran lo soin avèk sa, épi toudinkou in lékip malfondé i vien pou vol out afèr. Mé kozman moin la mark an-o la i konsèrn ni lo mayi, ni lo gardien mayi, li konsèrn sak in pé i pé i apèl in kokètri dann zyé. In moun kayeloush si zot i vé : lo dé zyé i rogard pa dann mèm sans. Si li di aou : « La plui i tonm Moka ! »Pé sfèr lo doi i amontr Moka mé lo zyé i agard in n’ot koté mèm lo d zyé i rogard pa mèm loté. Mi rapèl demoun lété konmsa, dann tan, l’avé ont in n’afèr final-de-kont la pa in l’infirmité sanm pou moin. Sé arienk pou kozé … Alé ! Mi kite azot rofléshi la dsi é ni artrouv pli d’van. Sipétadyé !