I fo dir ossi nout tout kréol ni apréssyé pa kan i gougnarde anou dsi noute fizik konm par égzanp kan nou néna zorèye an fèye lo shou, kan nou néna la figuir an shou-flèr, sansa konm la po konbava épi d’ote défo mi dira pa, pars sar pi koz an réspé konm mwin la di mé koz gratuitman dsi in défo in moune néna dann son fizik.

Parl pi kan i krétik la koulèr in moune pars la nou lé anplin dann rassism é sa sé in n’afèr a pa fèr. Pou mwin tout koulèr sé zoli koulèr, toute défo i mète an valèr in pèrsonalité, é mwin la aprann pa koz dsi défo fizik inn pèrssone pars la pèrssone lé pou arien ladan é si èl lé pou arien sa i vé dir lé pa élégan d’kritik son défo.

Pou rovnir dsi nout kozman konm ni di ali ni pé konsidèr sa konm in lérèr d’paralaks in zyé par rapor in n’ote : inn i done linpréssion rogarde dann in dirékssion é l’ote dann in n’ote dirékssion. In pé va dir in moune lé kaïloush é dann vokabilèr marséyé va di le moune néna in kokètri dann zyé.

Mi arète la pars mwin va vèks inn-dé é lé pa bon vèks demoune. Antouléka, mi kroi sa lé pa bon.

A bon antandèr salu !

Justin