Sarkozy la sèrv anou in program, mé son gouvèrnman la fé apopré lo kontrèr bande mézir li l’avé di li sava pran mèm si lo moune l’outremèr l’avé bien apréssyé. Hollande la konsilt anou li ossi, é sa la déboush dossi in l’égalité réèl ni pé dir la pa mark listoir noute bande péi. Macron la fine konsilt anou in foi, li sava konsilt anou in dézyèm foi… Dsi kossa va déboushé ? Ni koné pa ankor ! Nou va fé in pa an avan ? Nou va oir.
Astèr suivan sak mi ékri lé possib zot i pans i fo arète pèrd lo tan avèk lo bande konsiltassion, épi amenn la lite pou in bon l’avnir pou nou… Mwin, pèrsonèlman, si i domande anou noute dézidérata, i fo ni di, sré pa normal ni anvoye dingué. Nout pèp i yèmré pa ké ni rante pa dann lo dyalog avèk l’éta.

A ! Si nou téi koz noute toute d’in mèm voi ! A ! Si noute toute téi prézante lo mèm rovandikassion. Mwin lé sir gouvèrnman nora té blijé antand sak ni di, nout toute ansanm. Si li antande pa nout volonté, mi pans so kou issi nou noré été bien armé pou fé avans noute bande solission par la lite par raporte in gouvèrnman k’i voudré pa antande anou.

I parétré d’issi la fin d’lané nora in gran sobatkoz. L’èrla nou va oir vréman si gouvèrnman lé dispozé pou akonpagn anou dann shomin nout dévlopman mé a inn kondission sé ké noute toute rényoné ni mète anou dakor dsi nout rovandikassion é ni prézante anou ini konm lo sink doi d’la min.

Mé antansyon pangar, afors alé a lo kalbass i kass — a bon ékoutèr salu !

Justin