Akoz in bonpé dmoun lé asiz komsa dan so kaz la ? Banna la pou zoué kart ? Non ! Mi kroi pa. Sinonsa la pou zoué domino ? Té, non lo frèr, mi kroi pa. Banna la pou vèy inn ti fiy zoli kom in poupèt, parèy in ti baba sifon. Tout sa dmoun l’apou vèy inn ti fiy ? Bin oui mounoir, èl lé si tan tèlman zoli : i gingn pa fé otroman.

Tousala la bouzi la pou vèy so « si tan tèlman zoli ti fiy » ? Pourtan, la pa koup léstrisité ! Si lo frèr, mi di aou, i fo banna i admir son zolité, pars sa inn shoz i gat vitman. Anon ! rogard in kou so zolité alor !

Bin oui, mé zami, sa té in zoli ti-fiy : dann son gran rob blan sanm son ti sévé kafrine. Solman, son ti figir lé tris. Bin akoz don ? Son ti zié lé fèrmé. Astèr, tout demoun i plèr. I plèr pou lo ti fiy ? Agard bien lo ti fiy kafrine, mon kamarad, nana in moun la pran son zolité la parti ansanm. Non, la pa bondié sa ! Agard bien koman son ti figir lé kas-kasé, koman son sourir la fine fané. Ou na rézon lo frèr. Anplis sa in marmay sa.

Okilé lo volèr d’zolité, lo fanèr sourir zanfan domoun, lo tapèr d’zanfan ? Li, ansanm d’ot moun kom li minm minm lé ankor la ! Mé solman, so ti fiy-la, èk d’ot zanfan, la fine ariv dann péi bondié.

Ferard Elisa, Etudiante en Licence de créole