Pou kossa mi di sa ? Sinploman pars mwin la bien ékoute lo Prézidan la franss é mwin la antandi sak noute toute la antann, li vé in ranforsman la baz militèr La franss issi La Rényon é mèm talèr dann Mayotte san prann konte la prézanss ilégal La franss dann larchipel Komor. Pou arzoute èk sa La franss i vé pa tienbo konte son prézanss ilégal dann bannzil épars losséan indien-mèm si an aplikan lo droi internassyonal la dékolonizassion lafranss i doi rann bann malgash bannzil lé azot.

Astèr ni pé domandé kissa i sava atak anou ? Mi oi pa mé mi rode kissa néna bann sizé d’guèr dann losséan indien é mi oi Bannzil komor avèk La franss. Mi oi ankor Madagaskar avèk la franss. Alor la franss i ranfors son baz La Rényon : La Rényon lé dann danzé. Mi kroi pa.Mé i pé avoir in biz-biz rante Madagascar épi La franss : pa zordi, pa domin mé apré..Ni koné pa.

Astèr mi rapèl la franss la konssanti i fé in tour Oméga dsi téritoir La Rényon an plin dann la guèr froide.In risk ? L’armé russ dann tan té riskab raz anou san savon é la franss té i kass pa la tète pou sa. Alor, ankor in foi nou la bézwin losséan indien zone de paix… Ni koné zordi ni koné pa domin épi l’avnir sa i lir pa dan la Sann.

A bon antandèr salu !