Madégaskar i rolans son prodiksyon d’sik kann :

Dabor, avèk l’ède l’érop in sosyété la rolans la plantasyon kann dann dé l’androi, Nosi-Bé épi Brikaville. La arkomans plant kann dopi 2015 dann dé gran propriyété i apartien la SASM (Sosyété agrikol épi indistriyèl Madégaskar). L’ané 2017 dé l’izine va ardémaré ofisyèlman dann kouran l’ané dabor pou in prodiksyon 20000 tone do sik shakinn épi zot i pans trap in prodiksyon 100000 tone dann l’ané 2020. I fo dir nana o moins dizan lo dé l’izine la arète marshé (inn l’ané 2005, l’ot l’ané 2007). Bann journalyé épi bann z’ouvriyé la pèrd z’ot travaye é d’apré sak i di zot i dovré artrouv z’ot boulo firamézir. D’apré sak i di la SASM sé in l’antropriz privé avèk dé z’aksyonèr : la konpagni Vidzar nana 70 % lo kapital épi SIRAMA 30 %. Dann d’ot l’androi désèrtinn sosyété la romète an rout bann pti l’izine... Sète ané la koup la komans lo 8 moi d’juin é banna i prévoi in prodiksyon 160000 tone kane avèk bann sant konm Namakia épi Ambilobé. In pé partou i romète an marsh bann l’izine : kisoi i répar lo bann pyès, kisoi i fé vnir bann nouvo mashine sak lé nésésèr pou arfé tourn l’indistri kann. Sé in késtyon a suiv…

La Répiblik Sésèl : in nouvo prézidan Danny Faure...

Nou la fine anparl la sityasion politik dann Sésèl. Nou la fine dir l’opozisyon la gingn zéléksyon dépité moi d’séktanm é James Michel l’avé gingn zéléksyon prézidan la Répiblik dann moi d’désanm 2015. Lo prézidan Michel la démisyone son post sak’i fé ké lo vis-prézidan Danny Faure la pran son plas lo kinz oktob 2016 konm la konstitisyon i pèrmète ali. Lo nouvo prézidan la déklar li vé travaye dann l’intéré lo pèp séséloi pou fé in sosyété pli zis, pli imène é in péi plizanpli prospèr. Li la invite tout bann parti a travaye avèk li dann l’intéré lo pèp séséloi ; James Michel, pou son par, la déklar li va kontinyé travaye konm prézidan son parti Lo Pèp. Dann l’intéré La Répiblik Sésèl.

In l’agrandisman pou l’aéropor Sésèl.

Gouvèrnman Sésèl i vienn sign in z’akor avèk in sosyété Abou Dhabi (ADAC), in sosyété i sava étidyé lo prozé pou agrandi l’aéropor sésèl. L’aéropor koméla la rouvèr l’ané 1972, dann tan Sésèl lété ankor in koloni é li lé trop ti, koméla, pou akèy la kantité touris k’i fo. I fo dir lo touris sé lo pli prinsipal l’aktivité pou lo péi é banna i pans sèryèzman agrandi la kapasité pou akèy plizanplis voiyazèr. L’ané 2015 nana par-la 280000 pèrsone la akos dann l’aéropor Sésèl é konm i atann in bonpé plis voiyazèr, ala lo rézon k’i pous lo péi pou agrandi son l’aéropor.

Philippe Pauvreze désédé

Mi sort antann dann télé Philippe Pauvrez, in gran mizisien rényoné lé désédé. Tout bann z’amouré la mizik nout péi, moin lé sir, sar tris antann in nouvèl konmsa. Toulmoun i koné ali konm shantèr, konm konpozitèr épi konm instrumantalis. Li lé mor, mé son mizik lé touzour vivan é sa sé la maji bann z’aktèr kiltirel. In pti pansé pou li, pou an avoir rann nout vi in pé pli zoli, pou an avoir fé dans anou épi anshant anou ar son mizik, son parol épi son bann son, moin pèrsonèl moin la bien émé.