Rankont la frankofoni dann Madégaskar

Blakaout télé épi radyo ofisyèl dsi lo rankont ! Lé romarkab ké nout télé isi La Rényon la pa bate tanbour la dsi. Konm i di l’été pal o traka d’sisia. Poitan l’avé in bonpé shèf d’éta dann rényon-la. Shakinn la vni avèk in délégasyon, dé foi in gran délégasyon. Poitan Madégaskar sé in péi d’avnir, in gran péi dann lo fitir si mi tronp pa. In l’ansien koloni fransèz é inn shans pou nou rényoné. Alors pou kosa so l’éspès blakaout télé épi radyo ? Lété myé okipé ayèr, lété pa la avèk sa. Kan lo saz i amontr la line lo moun kouyon i rogard lo doi.

Lo prézidan Madégaskar la bien évite bann sizé k’i fash

Sizé k’i fash rant La Frans épi Madégaskar i mank pa. Kansréti sak i apèl bannzil épars dann kanal Mozanbik. Normalman, si lo droi intèrnasyonal lété réspékté, bannzil-la noré fé parti Madégaskar é La frans l’avé poin lo droi mète sa in koté pou èl épi donn l’indépandans Madégascar. Final de kont La Frans la fé konm l’Anglétèr avèk bannzil Shagos sof (an plis avèk Shagos nana in krime kont l’imanité).

Son l’opozisyon la roprosh ali sa !

In nouvo mouvman dann l’opozisyon i apèl “Madégaskar wake up !” la roprosh lo gouvèrnman son l’atitid par raport La Frans an partikilyé dsi bannzil épars. Zot la roganiz in gran shène imène pou krétik lo kolonyalism fransé. Mésyé Hollande son koté, la pa évite bann sizé konm la sékirité bann fransé kan zot i vien fé dé z’afèr dann lo péi par raport bann krime la fé kont bann fransé lé la-ba. In koté na lo mète épi l’ot koté lo kolonizé, i fo pa obliyé !

Pou rapèl in pé bann prozé Marok la mont la-ba dann Madégaskar

Nou la fine anparl lo kanal bann pangalane : in kanal plis 700 kilomète Marok i sava ède Madégaskar pou romète sa an l’éta pars li lé bien nésésèr pou dévlop l’ést lo péi. Arzout èk sa 22 prozé é la-dan nana in l’inivèrsité épi in gran l’opital modèrn plis d’ot sistèm lo péi la vréman bézoin. Pou lo roi Mohamed 6 l’Afrik i doi kont dsi l’afrik an promyé pou son dévlopman... Madégaskar sé in l’étape pou lo délégasyon marokène k’i doi dann l’ané 2017 vizite in pé tout péi fé dann sak toulmoun i oi konm lo kontinan pou l’avnir.