Nouvèl shagos

Alé oir ziska zordi té i parl lo rotour bann shagosien dann z’ot péi, ala ké zédi gouvèrnman bann z’anglé labate aryèr. Li la di konmsa lé pa bon pou bann shagosien artourn dann z’ot péi natal épi la propoz ashté z’ot doulèr avèk karant milyon liv sterling. Olivier Bancoult la fé pou répons, in péi natal sa i ashète pa, é li la di, li va pous l’afèr, in n’ot kou, dovan tribinal... Dsi la késtyonn la souvrènté l’il Moris gouvèrnman bann z’anglé la di biento, moi d’ désanm, va komans diskisyon. Alon gété pou oir, pars avèk in bann roulèr d’fos konm gouvèrnman bann z’anglé tout lé posib sirtou sak lé pli pir.

Prézidan la répiblik Sésèl dann la konférans COP 22

Mardi pasé, lo prézidan Danny Faure la fé in diskour dovan la Cop 22 k’i éspas Marakech dann Maroc. Sa in konférans pou lite kont l’éshofman klimatik. Li la di konm de koi, si bann pti z’éta insilèr dann dévlopman té i pé an avoir plis bidzé zot n’ora p amenn in politik pli aktif dann dévlopman dirab é pou amenn réspèk lo règloman la prann dann Paris (COP 21) pou anpèsh l’éshofman lo klima dépas dé dégré. Ni koné sa in baryèr si i désote sa, aprésa i gingn ar pi kontrol l’éshofman lo klima.

Trafik la drog rant Madagaskar-La Rényon épi Moris

Bann doinyé La Rényon la karsèr in bann trafikan tout sort drog. La drog té i sort Madagaskar épi la vni dann transit L’etang-salé, La Rényon pou arjoinn in bato té dann llo por Sint-Roz. Bann trafikan té i doi amenn la drog-la l’il Moris kisoi pou bann konsomatèr lo péi, kisoi pou fane sa in pé dann bann péi l’oséan indien. I paté lo éstok la dro téi roprézant plizèr milyon l’éro é sa i fé in bon bout tan bann douanyé lété apré avèy bann trafikan.

Li la travers la mèr dopi Moris ziska La Rényon

Nana dé-troi zour l’aktyalité lété braké dsi in ponpyé profésyonèl l’il Moris. Li ma désid travers la mèr a la naz dopi Moris ziska La Rényon. Pou kosa lila fé sa, Pars sé in manyèr pou li pou atir l’atansyon dsi bann zanfan malad avèk dyabète katégori 1. Nana plizanplis, é konm sé in maladi sournoi ariv ké pèrsone i romark pa é la maladi i anpir. Lo ga la pran plis 23èr pou fé son travèrsé : in l(ésploi a kou sir é in bon l’intansyon bien antandi.