La fièv aftèz :

Dopi samdi an kinz nout zournal l’avé tir signal d’alarm pars lo maladi té fine bien atak bann z’animo dann Rodrigues. Astèr Maurice osi, lé andikapé par sa : si in z’animo la trap so salté d’maladi i fo tyé tout lo troupo. Vaksiné ? Maurice i pé fèr, mé isi La Rényon lé pa otorizé par l’Erop… Astèr in pé i di : koman sa va ariv La Rényon ? In téknisien la shanm agrikol i di sa i pé ariv dann la tèr soulyé, dann la vyann, épi dann fromaz. Donk si i sèy pa garantir lo bann troupo ébin lé riskab ariv mové z’afèr é mi plézant pa kan mi di sa : pran prékosyon é tanpi si ou i pans lé initil. Tanpi si ou i pans i fé tro la dsi ! Pars si i fé pa asé, la katastrof lé dvan nou.

La vyann Madagascar avèk médikaman pou éstériliz demoun.

Dann in sobatkoz Roganizé dann Antananarivo, lo « Malagasy Professionnels de l’Elevage » ou MPE la fé konète ké ziska 80 % la vyann bann truie angrésé kan son bann pèryod roprodiksyon lé fine pasé lé kontaminé avèk bann z’ormone pou la kontrasépsyon. Sa sé in n’afèr défandi é sé in n’afèr danzéré pars lo moun i manz sa i pé an avoir lo kansèr, i pé pèrd la mémoir épi i pé gingn l’AVC. Anplis ké sa lé pa si fasil ké sa pou détèk so z’afèr-la é kan i détèk in bon déga la déza fine komansé . Parèy ké pou la fyèv aftèz, ni poz la késtyon : kansa va pran lé mézir k’i fo pou pa mète anou dann l’anbara ? Bann sèrvis ofisyèl sré bien inspiré d’pran bann mézir k’i fo san aspèr tro lontan(.(Source : Midi Madagasikara).

La vyan koshon défandi rantré dann l’il Maurice.

I paré la-ba dann Maurice si ou i sèy fé rant inn-dé boushon, in grap sosis, sansa salé osinonsa boukané, ou lé mal parti. La douane i sézi lo produi épi i aplik aou in l’amand karabiné. Mèm avan ké la fyèv aftèz té fine déklaré. D’apré sak moin l atandi dir, na si tèlman rényoné i sava Maurice é zot i yèm si tèlman inport sak moin la mark an-o la ké lo gouvèrnman la désid anpèsh bann produi-la rantré pou pa annuir z’ot bann z’élvèr. (antandi dann Radio freedom)