Z’éléksyonn mèr i ariv l’ané ki vien. Z’éléksyon-la, sa in n’afèr bann Rényoné i èm, sirtou z’éléksyonn mèr. In mèr, sa in pèrsonaz inportan dann in komine. Parl pi si bann komine lé gran ! Oplis lé gran, oplis ou lé inportan. Inportan pars demoun i kont dsi ou, inportan pars ou sé l’otèr si i ariv in n’afèr, épi par la ronomé demoun i fé aou. Konm i di souvan, si ou lé mèr, sé ké ou na in n’afèr pou gagné ! Kosa ? I koné pa tro, mé sirman nana vi k’tout demoun i di sa.

Astèr, si ni port in pé atansyon dsi lo z’éléksyon é dsi lo bann problèm. In mèr i pé fé vréman in kékshoz inportan dsi la késtyonn shomaz ? Mi pans, pa ditou. Touléka, pa dann in ka konm La Rényon. In mèr i pé fé kékshoz pou diminyé vréman l’ilétrism ? Mi pans pa non pli, pars sa la pa son pouvoir. Li pé fé kékshoz pou sov bann plantèr an plin mal mashoir ? Mi kroi pa. In mèr i pé konbat la mizèr, in gran problèm pou nou ? Pou moin, non. Alor, si ou na bon z’intansyon, pou kosa ou i vé èt mèr ? In promyé répons i pé èt sa : moin lé dann in parti i vanj pou dévlop La Rényon, l’èr-la mi pé ranfors mon parti si mi gingn in bon rézilta. Mi pé akonpagn bann projé La Réjyon ? L’égzanp, mi pé dévlop in komine otosifizan dan l’énèrji. In n’ot l’égzanp ? mi pé donn in kou d’min pou trap l’otosifizans alimantèr.

Boudikont, in mèr, dan son komine, bien akonpagné par d’ot partnèr, i pé donn in kou d’min. Mé i fo ni arèt kroir in mèr par li mèm va nyabou règ tout bann problèm la popilasyon son komine nana. Poitan, na demoun i kroi sa. Poitan, zot lé paré pou dir, sé lo mèr lé résponsab si zot la gingn in kou d’kongn.

Antansyon, désèrtin mèr, li mèm i kroi i pé sa. i fo dir zot lé pa forséman bien o kouran dan lo droi bann koléktivité. Mé koman alé avoué d’moun, sirtou si sé out bann z’éléktèr, ou osi ou la bézoin konsèy pars sa in matyèr ou i koné pa tro-tro. Dé foi lo z’éléktèr li mèm li pans li lé konpétan dan tout, éspésyalis dan tout éspésyalité. Moin lé dézolé pou sak i pans konm sa, pars kalité d’moun konm sa i égzis pa. Si li lé modès, sa in n’afèr li konpran, mé moun modès lé rar, pa konm korn lapin, mé kan mèm pa loin.

Kan la pli i tonm, losh èk l’éskargo i sort an kantité. Kan zééléksyon i ariv, kandida i sotr konm l’éskargo apré la plui. Na mèm in pé i pans sa sé in zé. In zé ? Oui, konm bann marmay té i zoué lou kasyèt avèk lou kouri. Inn ! Dé ! Troi ! Aou mèm lo mèr.

NB : Mi di pa sa pou dékouraj bann bone volonté. Mi di sa solman pou plézant in pé ! Mé in bon plézantri na touzour in fonn vérité. Zot i pans pa konm moin ?

Justin