Mézami, mi rapèl dann tan mwin lété marmaye : La pa yèr, mèm avan-avan yèr… Nou téi yèm zoué Lou kissoi lou kouri, kissoi lou kashyète. Pétète l’avé d’ote mé mi rapèl pi vréman. Antouléka kan nou téi zoué l’avé touzour lo mèr é sa té i tir o sor, zénéralman an shantan, pou oir kissa i sava rode marmaye kan lé kashyété, sansa kour déyèr pou trapé.

Sa noute toute i koné sa, mé sak mi vé rapèl azot sé ké dann tan dann zélékssyon l’avé lo kandida ofissyèl é kandida-la lété Michel Debré, oir mèm lo préfé téi désside an fète kissa sar élu. Donk l’avé in déssinatèr téi apèl Kaniki é déssinatèr-la téi fé déssin pou kass lé kui bann zofissyèl.

Alor mi poz azot la késtyon : kan li la fé in karikatir, avèk in Virapoullé i kour d’van é in n’ot zélu — mi rapèl pu si lété Debré — i kour déyèr épi i tape troi foi dann do épi i di sak mwin la marke an-o la… Mi panss zot la konpri sa téi vé dir sifraz inivèrsèl téi konte pou la po patate.

Alé ! Ni artrouv pli d’van, sipétadyé.

Justin