Oté

Inn-dé z’éléman l’aktyalité l’ariv somenn pasé dann nout réjyon

Justin / 26 novanm 2016

In nouvo kardinal dann l’oséan indien

Samdi dèrnyé lo pap la désid donn monségnèr Moris E Piat lo grad kardinal l’égliz katolik. Zédi 24 novanm la rotourn Moris, dann son péi. In komité d’akèy la vni zoinn ali l’aéropor Plézans. Saj lo promyé minis té la, bann minis té la galman. Arzout èk sa in bonpé dépité désèrtènn pèrsonalité é bien antandi bann z’otorité rolizyèz. Lo nouvo kardinal la di li lété bien kontan rotourn dann son péi : « Mo dir zot franmo bien kontan monn rétourn la kaz mama. » Aprésa, li la anparl la misyon lo pap Fransoi la konfyé ali dann la sityasion son péi i konète avèk bann problèm konm sète. Li la lans in z’apèl pou la solidarité, pa solman an parol, mé galman dsi térin. Sanm pou li, shakènn i pé pran soin in frèr, in sèr, in n’ot pèrsone pars si ni okip lé z’ot konm k’i fo ni pé bien viv konm in z’artizan la pé.

Nouvèl Sésèl

Lo prézidan la répiblik Sésèl, Danny Faure, sar prézan Madégaskar pou lo sézyèm somé la frankofoni. Somé-la néna pou sizé prinsipal : « Kroisans partazé, dévlopman dirab, kondisyon pou in mond é in l’éspas frankofone pli stabl ». Lo prézidan va sort Sésèl lo 25 pou artourn dann son péi lo 29 moi d’novanm... Mi koné pa si gouvèrnman fransé va pans invite o moins in délégasyon La Rényon mé kan ou i azout inn, avèk l’ot, avèk l’ot ankor tout lo bann mankman lo gouvèrnman sosyalis la fé prèv par rapor nout péi mèm in pti éstrapontin i koriz ar pa son mank konsidérasyon.

Somé la frankofoni

Lo roi lo Marok la vni Madagaskar avèk in délégasyon pré d’ kat san pèrsone dann troi l’aviyon. Mi koné pa si lé an souvnans son gran-pèr lété égzilé par koté Antsirabe, sansa sé pars lo Marok dsi lo plan ékonomik l’apré pran l’inportans ké ni koné é lé pa désidé lès nout grann voizine par koté. Péi afrikin konm li, lo Marok n’oré désid pa zap l’avnir malgash... Dan sé kondisyon i fo tir shapo l’asosyasion REAGIES pou son l’aksyon mémoryèl par raport sak i apèl lo z’évènman Madégaskar l’ané 1947.