Sanm pou mwin si la késtyon travay la Rènyon promiérabor pou rényoné déza, mi trouv i mank a nou touzour in santim pou fé in léro, poitan ni arèt pa koz la d-si, ni fé inn ti pa dovan, ni fé dé ti pa déryèr mé boudikont zamé inn va trouv la solisyon. Ni wa byin, tou lé z-an pou la rantré éskolèr ni wa, ni anvoy in takon jèn Rényoné néna gro-gro diplom linivérsitèr la ba déor é an minm tan ni inport otan isi.

Kèl trin ? Zordi in lasosyasyon ki roprézant bann fransé loutromèr la mont o kréno konm i di, li rokoné li minm ké néna tro lanplwa i éshap bann ziltramarin é galman a nou minm Réyoné. Banna i di a zisto rézon, si néna in lanplwa i libèr é sak i postil néna minm diplom, minm konpétans rant-rant dizon, i di konmsa odrémié anploy Rényoné. Ni bat la min.

La zordi i tonm byin, nou la bozwin in rèktèr pou nout lakadémi i di. Sa in bèl-bèl lanplwa. Sanm pou mwin lé ankor pli difisil kan i sazi bann bèl-bèl lanplwa, konm si néna i rézign pa zot donn a nou inn ti gingn pouvwar. Pou ti lanplwa, konm pou mwayin lanplwa, ousinonsa bèl-bèl lanplwa konméla nou néna tousala isi. Lo moman lé v’ni pou règ sa in fwa pou tout. Sov si néna inn i aksélèr é dé i péz si lo frin.