Nou la aprann dann zoinal lo réktèr Marimoutou la parti pran in post sokrétèr zénéral la COI (komisyon loséan indien). Moin lé kontan pou li, pars mi pans sa sé in rokonésans son valèr pèrsonèl … Astèr mi poz amoin in késtyon , plis pou la form ké pou lo fon pars lo fon moin na konm linprésyon mi koné ali : donk mi domann amoin si sa i shanj kékshoz dann La COI. Dizon si in sokrétèr zénéral rényoné i shanj la natir la COI sansa si shanj pa. Si sa i rodone anou la plas nou néna natirèlman an parmi bannzil loséan insien sansa si i rann a nou nout plas-la.

Mi oi in gro défo dann la COI : Dabor li égzis pa tro dann kèr bann rényoné, épi in n’ot afèr La Frans la bien bord anou dann sète afèr-la. Nou lé kaziman dann kanal, é nout mèr patri lé konm lo koukou kan li sava ponn son zèf dann ni la pa li. Alor lo nouvo sokrétèr zénéral, avèk tout kalité toulmoun i rokoné ali, i pé sansa i pé pa rétabli anou dann nout droi natirèl. Sirman la pa sa la donn ali pou misyon. Alor kosa ni pé éspéré ? Sa i dépann la frans épi bannzil loséan inden…é pétète in pé la volonté politik La Rényon… Mi antan déza d’isi in pé apré di dann mon trou d’zorèye, mi rèv évéyé… Pé sfèr, i mank anou in jéan dsi lo poinnvizé politik é ni oi pa sète-la a nout lorizon.

Inn i sava, l’ot i vien. Marimoutou i sava, madam Manès i vien : nou néna in réktèz rényonèz é moin pèrsonèl moin lé bien kontan. D’apré sak i di an plis èl lé dann séraye lédikasyon nasyonal... In séraye la sé konm in prizon sa non ? Mi pans si la mète aèl dann gro post-la, sé pars i rokoné son valèr. Mé èl i pran la plass kèlk’in té tré valab galman, mé kosa li la gingn fé ? Mi pans li l’aplik la politik son minis épi sète-la mèm l’aplik la politik son gouvèrnman. La nouvèl réktèz va kontinyé fé lo mèm zafèr, pars mi oi pa koman in gran komiz l’éta i pé fé otroman. Sa la pa d’moun pou donn kou d’pyé dann brankar sa ! Sa i kapote pa la tab sa ! mèm si i fodré.

Alé ! Mi kite azot rofléshi la dsi. Tout fason nou va oir avèk lo tan. Fyé dosi, mé kont pa tro. Inn i sava l’ot i vien mé pou fé koi ? Nou va oir avèk lo tan.