Oté

« Inn+l’ot, lé touzour myé ké inn san l’ot » : modékri pou zoinal zédi .

Justin / 10 janvier 2019

Matant Zélida la ékrir Justin :

Mon shèr nové, mon spès salté, rouj-de-fon dopi in étèrnité, moin néna in n’afèr pou out parti épi pou ou mèm fé.Vi koné lo prézidan i sava déklansh in gran sobatkoz dann tout La Frans, pou d’mann demoun kosa zot i pans dsi son fason gouvèrnaye lo péi.. Konm mi koné, zot bann rouj zot i yèm sa sé lokazyon déklar sak zot i pans.I prétan zot la fé sa dann tan Sarkozy, dann tan Hollande, akoz pa dann tan mésyé Macron. Tout fason si na poin arien pou dir i pé touzour fèrm z’ot také.Alé, plito k’kozé i vo myé azir non ?Tok ! Pran sa pou ou !

Justin la fé pou répons :

Mon vyé matant k’i koz toultan la boush rouvèr, mi pans out l’aktyalité néna l’trou d’dan pars nou la fine di nout poinn vizé mésyé Macron dsi sak ni pans lé bon ,domin, pou nout péi La Rén yon épi pou nout voizinaz galman.

Lé vré nou la fine dir sak ni pans kan Hollande la domandé, mé li la pa vréman tyinbo kont.Dann tan nou l’avé di galman sak ni pans mésyé Sarkozy : li la fé konmsi li l’avé ékout anou, mé tro tar é li la pa gingn lo tan mète an plas sak li téi apèl lo dévlopman andojène.

Lo gran déba ou i anparl,pèrsone i koné pa ozis dsi kosa li sa porté.Si sé arienk pou donn manzé la boush , é fé bate la lang dann tou lé sans é mèm a kontrosans ni oi pa tro kosa k’i ansèrviré di nout dé mo. Mé si i vo la pène akoz pa ?

I vo myé kozé ! I vo myé azir !Inn+l’ot lé touzour myé k’inn san l’ot.

Justin