L’èr-la, konm in bonpé, mi domande amwin kossa k’i pé fère k’in majorité rényoné i vote pou in kandidate konmsa. Mi pé trouv bonpé rézon, mé an parmi mi pé trouv in rézon é sète-la mi panss sé in bon rézon : la kolèr, mé in rézon mal kanalizé – d’apré mwin.

Dabor la kolère : mi panss èl lé léjitime pou toute sak i ariv shé nou dopi dé tanzédétan. Mi sava pa dire toute kalité rézon demoune néna d’ète an kolèr, mé zot konm mwin ni koné la majorité lo pèpe rényoné néna dé rézon pou li ète an kolèr. Anpliss ké sa, la kolère lé pa né yèr, èl lé né dopi lontan é èl lé ramassé. Donk i fo pa ni konte fé pass ali toutsuite pou toutsuite d’in kou d’baguète majik.

Li va pass pétète in pé avèk noute libérassion si èl i ariv in zour.

Aprésa mi di la kolèr lé mal kanalizé é kossa mi vé dire par-la. Mi vé dire nou lé an kolèr, mé san konète bien klèrman kissa é kossa la mète anou an kolère dopi lontan. Bande zom politik rényoné ?On pé, mé sirtou bouc émissaire. Macron, li l’ariv néna dë zour ! Bouc émissaire galman mèm si i fé pèye ali pou lé fote passé la plipar d’tan lézot la fé.

La vré rézon, sanm pou mwin, é mon parti la fine di sa dopi lontan, sé pars nou néna in sistème lésploitassion k’i apèl lésploitassion néo-kolonyalist é k’i ral anou toultan déyèr. L’inégalité ? Sé li. L’inzistis ? Sé li. Lésploitassion ? Sé ankor li. La vi shère bazé dsi in sistème konsomassion li la in poze a nou ? Sé li. La pèrte nout shans ? Sé li touzour. La Mizère pou in bonpé ? Sé li galman.

Alor nou la kalkil noute biltin d’vote i pé pèrmète anou dir nou lé an kolèr é sé konmsa ké lo vote la done sak li la doné. Zot i pans mwin lé dan l’érèr ? Pétète in pé mé pa san pour san.

Inn la kolèr pran moi.

Justin