Na poin lontan dsa moin lété apré diskite avèk in kamarad dsi in létèrnèl késtyon. Ala lo késtyon : pou kosa demoun lontan - pli maléré ké l’moun koméla !- lété d’apré nou pli kapab rézisté fas-a-fas avèk lo loprésèr ké li pé gingn fé zordi alé oir i dovré z’ète lo kontrèr. In gran késtyon, san répons bien antandi. M’a dir azot in n’afèr : la pa pars in késtyon néna poin répons klèr k’i fo pa poz ali… i fo poz ali kant mèm kansréti pou fé avans in pé lo smilblik, ko nm té i di dann télé. L’èrla mon dalon la di amoin fitintan lo moun l’avé poin la krintiv an avoir kékshoz pou anpèrd, alé oir koméla demoun i pans zot néna kékshoz pou anpèrd : kisoi in travaye, kisoi in sokour, kisoi pou zot mèm, kisoi pou zot famiy-in mank l’otonomi pétète ?- Sak i fé konm lo kozman i di : inn la pèr, l’ot i krin ! Sak la pa pèr i krin, é sak i krin pa, la pèr. Pétète o fon lé konmsa de tou tan é suivan out limèr di moman, ou i zète in zyé optimis dsi la késtyon sansa in zyé pésimis. Alé ! Mi kite azot rofléshi la dsi, é ni artrouv pli d’van. Sipétadyé !