La-ba dann l’Italie, nana in prézidan i apèl Berlusconi, li yèm pa bann romanishèl : li di sé banna k’i fé l’insékirité dann lo péi, i anpèsh bann z’italien viv trankil.

Zot i koné sak i éspas kant ou i répète in mansonz in bon pé foi, momandoné demoun i kroi sé la vérité. Alors i ariv drol dé shoz : ékout in pé !

Dë pti fiy "rom" l’apré vann bann pti kolié zot la fé déssi la plaz. Ala k’lé dé i artrouv azot dan la mèr. Zot i koné pa nazé, zot i noiye... In pé dmoun i tir azot dann lo, zot lé mor, i mète in sèrviète déssi zot. Apré, la vi i kontinié : sak i manz son glas i manz son glas, sak i shof solèy i shof solèy, sak i zoué èk son téléfone portab i zoué avèk, épi na dë zanfan d’moun mor déssi in plaz pandan in n’èr d’tan san k’sokour i ariv, san k’demoun i réspèk o moins z’ot mortalité, kansréti, in pti pé, kansréti inpti bout tan. Konm si dë pti fiy romanishèl, lé pa inportan !

Mé tout lé pa si mové dann l’Italie : par ébzanp : bann dépité i sort vote in loi pou mète an silans in bann prosé akoz tribinal lé sirsharzé. An parmi nana in pé prosé kont lo Berlusconi li-mèm pou bann z’afèr malprop li la fé...

Konm di li kont : « moin nana dë nouvèl pou anparl azot. Inn lé mové mèm, l’ot lé pa bon non pli ! »

Justin