Kissoi zoignon ? Kossa mi di la, lo pri zoignon la pa ariv ziska zorèye Justin ? Non lé ga, nou lé pa sour, nou lé pa avèg, ni lir zoinal konm toulmoune épi ni koné bien néna in problèm dsi zoignon. Ni sorte aprann sé arienk linportassion i sov anou é i paré l’Inde, noute pli gro fournissèr, la blok lésportassion si tèlman néna in mank é ki di in mank di in pri k’i goumante.

In pé va di : déboul aou avèk oute lotonomi alimantèr astèr !.. Zistoman opliss i ariv bann kriz konmsa, opliss sa i ranfors anou kominiss rényoné dann lidé néna arienk lotosifizanss alimantèr pou sov anou. Sèryèzman lé ga noute bann plantèr lé kalifyé, noute bann téknissien la shanb i koné zot métyé, noute tère inn an parmi sak néna d’méyèr dsi la tèr. I rèss arienk lo politik pou rante dan la danss.

Rante dan la danss koman ? Dabor i fo l’érope i konsidère anou konm partnèr é i arète pass anou kalpyé konm l’apré pass anou é noute kamarade Elie la anparl sa pa pli loin ké dimansh dèrnyé. Lé pa bien sak Lérope i fé dann noute do, i fo i koz ossi avèk nou é pa arienk avèk noute bann konkiran. An pliss ké sa i fo lo méyèr formassion pou noute jenn é lo méyèr ékipman tropikalmman adapté épi la roshèrch lé ga-san sa pa d’salu !

Alor m’a dir azot franshman shak foi néna in kriz dann noute aprovizyoneman par linportassion i ariv, sa i doi ankouraz anou dann noute shomin pou lotonomi alimantèr ; a kondission ké la kriz lé pri konm in kriz donk konm in lésson pou alé pliss an avan.

An atandan ni di é ni rodi, lotonomi alimantèr sa lé possib, é sa lé nésséssèr, é dann noute lintéré.

A bon antandèr salu !

Justin