Somenn dèrnyèr dann Por l’avé in gran manifèstasyon kiltirel. Bann roganizatèr l’apèl ali : « Kabar liv la kréolité ». In bonpé zékrivin la vni la. Kisoi pou fé konète zot liv ! Kisoi pou rant dann ron in sobatkoz dsi in problèm kiltirel ! Kisoi ankor pou lir zot liv-inn dé paj-an parmi l’moun ! In pé la vni osi pou zoué bann pyès téat dann Téat sou pyédboi ! d’ot pou fé pass zot fime. I pé dir, pou nou La Rényon, sa in manifèstasion inportan é moin lé sir lété pa fasil pou roganiz in n’afèr konmsa. A ! moin té sar obli di azot, bann zékrivèr i sort in pé partou ousa nana bann popilasyon kréol.
Dann bann sobatkoz nana dé zafèr la intérès amoin bien pars sé dé zafèr mi pans toultan, si tèlman moin la pèr pass par koté lo bi moin l’ apré avizé. donk mi vé poz dé késtyon :

Promyé késtyon :
Pou kosa désèrtin i ékri an kréol ? Pars lé pa fasil ékri an kréol, kan ou la parti lékol an fransé é kan ou i trap out éstilo, dann promyé mouvman, sé lo fransé k’i koup dovan lo kréoll. Sak i ékri in pé an kréol rényoné, sansa in n’ot kréol, mi pans, i doi konprann sak mi di… Pou réponn la késtyon moin la poz an-o la, na plizyèr manyèr oir lé shoz ; pou in pé sé konm in misyon pou zot : ofèr bann jénérasyon, sak va vni domin in kantité zoli tèks pou donn azot lo gou pou zot lang. Pou d’ot sé konm in l’anvi, in plézir d’partaz avèk lé zot par ékri é zot i souète lo moun i trouv lo plézir dann la léktir, konm zot la trouv lo plézir dann l’ékritir malgré la doulèr. Pé sfèr osi ou i san aou bien arienk dann in lang kréol épi sé arienk la – dan ké ou i san out kpasité pou anbèk dann la kréasyon. Dé foi, konm di lo kont, sa i ariv dann fil de lo, konmsi konm si k“l”inspirasyon i pous out plime an avan… Na d’ot rézon biensir, mé ni sava pa drèss lo katalog.

In n’ot késtyon ankor
Ké l’apré zigil amoin. Mi domann amoin si ékri an kréol lé forséman in manyèr pou rant dann ron la litératiré la kiltir popilèr. Mon répons : lé vré konm pa. Pou kosa ? Pars, si la litératir popilèr sé in litératir zoli épi fasil, a tou lé kou, ou lé dann in lésprésyon popilèr... mé antansyon ou i pé z’ète arienk dann in rozis artifisyèl bon pou rouv shomin pou l’alyénasion pars ou i kas pa avèk bann zidé dominant, bann zidé banal, sak i fé pa réfléshi mé i anbar shomin la réflèksion… Solman si out léktritir lé dir, lé difisil pou konprann, mèm si dsi lo plan éstétik i pé ral lo léktèr kan li fé l’éfor pou rant anndan é si li ariv a fé in bout shomin pou li dékouv ali par li mèm, sansa son moun, sansa ankor son pèp ou sinonsa son nasyon ou lé pa dann in litératir popilèr mé ou lé myé ksa.invité pou in voiyaz ou na poin l’okazion fé tou lé zour.