Mi sort lir Konsèy réjyonal la déside goumant bidzé l’IRT, a pène kinz zour avan la finisyon l’ané. Banna la trouv sis milyon l’ero an plis pou done ali. Èk trèz milyon li la fine an avoir, i fé so kou issi diznèf milyon l’ero. Sa i trouv pa sou la pate shoval sa !

In pti rogar an aryèr

Toute demoun i koné la prézidante l’IRT. Toulmoun i koné son valèr dann la mizik, lo dansé épi la romans. Mé i pé an avoir in gran valèr dann bann domène-la, san konète forséman jèr in bidjé konm k’i fo. Nana byin lontan, kan èl té lo shèf-an-tète kaloupilé, Konsèy zénéral té oblizé dir aèl arète in kou pars, d’apré sak bann zournal té i rakont dann la jéstyon l’avé konm in défo. Donk la mète la klé déssi la porte.

Anvoyé k’i di ! Dépansé k’i di !

Ala k’Didier Robert la trouv moiyin mète aèl prézidante l’IRT. Byin antandi, èl la rant dann train, si i pé di sa konmsa. É konm toute la bann sé in bann gaspiyèr larzan piblik, la prézidante Zakline la tonm dann son bèr, é k’i bate dé bèr lish son doi. Dépansé, li la di dann son tète, sa sé in n’afèr li koné fèr é anvoyé ki di ! Pli sigal ké fourmi, èl la dépansé é sirman méssyé Didier la pa mète in frin. L’èr-la, ni ariv la finn l’ané. An prinsip si ou la byin kalkil out dépans lé shoz lé klèr. Sof pou l’IRT !

El la bézoin sis milyon pou fini l’ané ? Donk done aèl son sis milyon. I sorte pa dann zot posh mé dan la posh bann Rényoné. Donk akoz privé ? Done di gaz !Anvoyé. Mé dann la lang kréol nana in patoi i pé pèrmète anou diriz nout vi. Patoi-la i di konmsa "I mète pa lo shate pou vèy de lé !". Obli pa !

Justin