Pou kossa néna bann loi d’la guèr ?

Sé pou protèz bann moune i partssip pa la guèr donk sé pou dir sak bann solda épi bann gouvèrnman i pé fèr é sak zot i pé pa fèr. Lo droi d’la guèr i protèz bann sivil, bann zanfan é an zénéral toute sak i fé pa la guèr dirèktoman. Bann loi la guèr i défann ashèv bann prizonyé, i obliz lo péi okipan soign la popilassion sivil, é nourrir azot konm k’i fo ; la loi i protèz galman bann zoinalist.

Mé si ni ékoute bann nouvèl sak i éspass laba dann Gaza ni apèrssoi la popilassion sivil i gingn pa fé soign aèl, i gingn manzé par shikète, é anpliss kan demoune i vien rode manzé l’armé okipante i tir dsi zot. La fine tyé pliss soissante mil pèrssone dopi 2023 ké la guèr la komanssé.

A ! biensir lo shèf Israel Nettanyaou i di na pwin la famine, i di ankor sé bann Hamas k’i sèrv la popilassion sivil konm boukliyé imin, mé sé bann kozman i pass pi la ranpe zordi pars ban témwin i fé pass linformassion firamézir, sof kan i tyé bann zoinaliss pou anpèsh azot fèr zot métyé konm k’i fo.

Néna ossi bann tribinal pou ziz bann kriminèl de guèr é lo tribinal pénal internassyonal lé kréé ékspré pou ziz bann kriminèl de guèr kissoi sak la komann bann violassion lo droi d’la guèr, kissoi sak la vyol zot mèm lo bann loi.. Sé konmsa ké lo tribinal pénal internassyonal i domann pou ziz lo Nettanyaou… Mé ziska zordi li sava in pé partou san riske arien.

Problèm ? Lo vinkèr sar zamé zizé sirtou si li néna bann konpliss konm zétazini normalman lo péi néna lo pli for l’armé é li mèm résponsab bann krime de guèr konm sak l’ariv dan l’Irak, dann vietnam épi d’ote péi ankor. Mèm pou sak li fé zordi konte Cuba lé pa tro lwin d’ète in krime konte limanité.

Zordi nou la aprann in bonpé bato va sèye alé dovan Gaza pou fé arète bann krime-la. In médssin la fé in konféranss vandredi soir lété apré ésplike sa. Li la ésplike ossi bann rényoné la ramass larzan pou léspédission dovan Gazza. In fyèrté pou nou pars kan i anparl la solidarité, issi pou nou la pa in parol anlèr.

A bon antandèr salu !

Justin