Bann franssé i yèm bien in éro i apèl Napoléon Promyé, in gran zénéral, in militèr d’jéni, in moune l’amenn son bann zarmé in pé partou dann bann téate la guèr si tèlman li téi aparète konm invinssib é sak té i atake ali lété sir son défète lé o fé. Mé oila sa la dir in sèrtin tan épi momandoné sa l’arété. Son karma l’avé shanjé épi afors li té i fatig lé z’ote momandoné, konm i di, la trouv son poin fèb. Mète an mète, néna son mète.

Biensir mi sava pa fèr azot in lésson d’istoir dsi Napoléon, pars avèk in pé d’probabilité, lé possib an parmi mon bann léktèr néna déssèrtin i koné listoir Napoléon myé k’mwin mé si mi anparl azot sa sé pou dir azot lo karma in gran bononm i pé shanjé é la viktoir d’zordi i prépar pétète la défète pou demin.

Zot i koné Napoléon la gingn son kou d’rèss trankil dann in kartyé i apèl Waterloo épi zapré toute son bann konkète la fil rante son doi é li la fini son zour dann in pti lil l’afrik i apèl Sinte Hélène.

Astèr pou kossa mi di sa ? Mi di sa pars néna in bonpé péi i fé lo vèr inpé partou, i bonbarde dann Moiyin oryan é zot i panss zot lé invinssib pars dopi 1967, pétète avan, li la donn lo batlavé in pé toulmoune ; mi vé anparl Israël, in péi vayan dsi lo poinnvizé militèr é k’i ézite pa détrui, bonbardé, tyé d’moune é sirésèrtin in bon pé i panss pèrsone i trouv arpa son boute.

Poitan li néna intéré fé la pé. Li néna intéré ménaz ossi lo bann pèp son landroi. Momantanéman, li panss li pé koriz toulmoune, mé konm i di, néna in zour i apèl domin é pèrsone i gingn pa dir de koi domin sar fé.
A bon antandèr salu !

Justin