Si in zour ou i gingn l’anvi vnir vizite La Rényon... si in zour ou i vé konète in pé nout listoir, mi pans nou na toute sak i fo, konm diré l’ote, pou fé fèr aou in voiyaz inisyatik. Déssi la plas la Préféktir, ou va trouv in léstatu va byin intérèss aou : sète gouvèrnèr Labourdonnais. Ou i koné, lo boug la trouv in téknik pou konbate bann zésklav té i sava maron, an donan in prime pou bann shassèr zésklav, provik’zot i armène la min bann zésklav tyé dann zot bèrtèl… épi si ou vé oir fiziy Mussard, lo shassèr, mizé Léon Dièrx, lé pa byin loin, moin lé sir ou va oir sa la-ba, provik i tir sa l’androi li lé kashyété pou armonte demoun.
Si ou i vé konète madame Desbassyns, la dézyèm providans, lo kar ZPL va amène aou Sin Zil lé-o. Sar in régal pou oute zyé, sar in rosoursman pou oute l’imazinasyon. Arzoute èk sa, va mète byin an l’évidans in Kode noir, sète mil sète san vinn-troi, konmsa ou va byin konprann lo ran lé z’inn épi lo ran lé z’ote, é koman i maye pa torshon avèk sèrvyète.
Kan ou sar fatigué, ou va arpoz dann guète-ali, in gran kaz dan la ri d’Paris... Si plé t’a dyé, in listoryin ofisyèl, inn an parmi sak la révizyone konm k’i fo nout listoir, va vni ésplik aou koman, avèk in min an fèr, la nyabou fé rèss bann zésklav trankil épi anpèsh azot révolté.
Solman si ou lé mal fondé, si ou i vé rode in pé tro lo boute, si ou i vé konète la kultur noute z’ansète té i sorte l’Afrik, l’Inn, Madégaskar, Komor, la Shine. Si ou i domann ousa nana in mézon, in sorte mizé vivan, pou pèrmète aou konprann koman La Rényon la vni a bou, travèrs in listoir barbar pou gingn trap son l’inité, son l’armoni, son léspri la tolérans. L’èr-la, va di aou shap, kour loin, pars issi, konm di bann doinyé, na poin aryin pou déklaré !

 Justin