Mé bande mové nouvèl i arète pa la, pars l’INSEE i sorte ankété dsi la rotrète bande pèrsone azé é pa d’mirak ankor in kou : issi mèm bande rotrète lé pli fèb é lo rézilta dsu lo nivo d’vi bande pèrsone azé, zot santé galman, zot vi pèrsonèl i pran in sèryé shoke é toute sak néna vyé pèrsone dann zot voizinaz sansa dann zot famiy i pé pa done amwin la démanti.

Rényon promyèr la fé koze inn-dé moune é banna la gingn lokazyon pou rakonte zot maléré sor. Pars sé in maléré sor pou vréman : In madam la di èl lé ko-lokatère avèk son garson i toush lo RSA pars na poin travaye dopi lontan é lé dir pou zot pou zoinde lé dêboute par l’milyé. In madame i viv avèk son mari azé i antan pi, épi i koze pi non pli : lo soin i koute shèr é dopi dé zané zot la poin okin plézir dan la vi. In madam vèv, azé galman la di, pou son par, èl i anpé pi.

Antansion, i ariv dann in sossyété bande pèryode la kriz, mé sa la pa la krize, lé konmsa toultan – a suiv, a kontinyé – é konm répons zot i manke pa gingn bande promèss mé bande promèss i transform pa zamé an réalité. Si i azoute avèk sa lo shomaz, lo mal lojman, la vie shèr d’in boute a l’ote l’ané ni oi bien néna in kantité viktime lo départmantalizassion gréfé dirèk dsi lo sistème néo-kolonyal.

A biensir, i fo pa alé konpar la sityassion bande rényoné, avèk sak i éspass dann d’ote landroi, mé ni pé dir la pa pou sa ni fé parti d’in péi sis-sétyèm grande puissans dan lo monde. Déza dan la Franss la pa briyan, mé issi La Rényon konm dann plizyèr péi l’outre-mèr lé ankor moin briyan… Ni koné néna plizyèr rézon pou in réalité konmsa, mé d’apré sak i paré opliss i sava, opliss la sityassion i dégrade é nou mèm dann l’outre-mèr nou la poin noute déstin an min. Alor in pé i domande bande nouvo député monte in pé o kréno é amontr zot i aksèpe pa in sityassion konmsa. Mi doute pa k’in pé va réazi, mé d’ote mi krin zot lé riskab aksèpe la sistyassion konm èl i lé. Inn foi kostardé sansa tayérizé épi anbarké dann l’aviyon, lo monde lé pli bo… Pou zot, pa pou bande bordé d’noute péi.

A bon ékoutèr salu !

Justin

NB-La prèv, sinkan i sorte passé. In mandatir i sorte passé é mwin la pa vi in loi programme – mèm in projé d’loi – pou konbate la mizèr. Donk mi pans sa i intérèss pa vréman bande zansien député amoinss inn foi laba, zot lé tro anklavé poupran linissyativ k’i fo ! Alor bande nouvo ! La rézistans siouplé ! Réziste in pé ! Ni konte dsi zot. Pars an atandan kabri i manze salade.