Matante Zélida la ékrir Justin :
Mon shèr nové, mon spès salté,
Moin la pou suiv aou déssi out bann kozman déssi l’ilétrism. A ! konmsa ou i rode mète gayar lang fransé égal-égal avèk nout patoi rényoné ? A ! konmsa ou i rode mète nout patoi partou : l’ékol li ! l’administrasyon li ! la politik li ! Assé révé mon nové ! Fo-til bann rouj de fon la tourn out tète avèk zot kozman an ki-si-tète ? Vi voi pa in n’afèr konmsa lé pa possib ? Nou la poin lé moiyin, é rozman dayèr. Sak in bèf i pé fèr, in zèf i gingn pa ! Tok ! Pran sa pou toi !

Justin la fé pou répons :
Mon vyé matante k’i koz touzour la boush rouvèr,
Ala ankor in kou an dé kou d’plime ou la débal toute le fatra la kouyonis i anklav out léspri. Pou tyinbo arienk in n’afèr déssi nout kapasité mète in program la lite anlèr :

Dabor inn, déssi l’ékol biling, ou i koné nana plizyèr santène amontrèr shak ané lé volontèr pou fé sa. É bann volontèr bien an kapasité siouplé. Nana in formasyon bann mètr issi La Rényon, é i sré bien fézab mète anlèr so l’ékol biling la… konm di lo kont, mark sa dann la démarsh pédagojik. Nana diplomé La Rényon, é zot i mank pa kouraj ; Zot i pé bien fé l’ékol biling kréol-fransé... anplis, si zot i gingn zot soso la-dan, koué d’myé ?

Pou sak i sar pi l’ékol, moin lé sir nana ossi in bann solisyon. I défiskaliz pou in oui, pou in non, akoz i défiskaliz pa la lite kont l’ilétrism pou demoun lé dann in plas travay ? Arzouté èk sa, lo patron nana toute pou gagné déssi la kapasité son salaryé. Nana galman lo bann finansman Pole anploi, bann program gouvèrnman, larzan la formasyon profésyonèl. Akoz pa lite kont l’ilétrism avèk so bann moiyin-la ? Mi trouv mèm, shak Rényoné lo pla in pé gonflé épi k’i èm son péi i pé prète larzan in kès éksopré pou sa. Va rann ali, in zour, mé son larzan nora bien travay.

Avèk in bon mobilizasyon nout zénès, dann nouvo métyé-la, l’amontraz pou bann zadilt, mi pans nou lé kapab fé in n’afèr konmsa... kant mèm la di !

(La fini)

Justin