Li nana douz an. Son papa nana trant-troi épi son momon vint-nèf. Sa in bann "sans papiers" i rèst Amiens, dann nor La Frans. Zot i sort La Russie : zot la sové akoz zot i pans zot té an danzé dann z’ot péï. Zot la domann lo droi pou rèst dan La Frans, solman La Frans té i vé pa d’zot.
Ivan i sava lékol, donk nora di donn son famy lo droi rèsté mé zot la pa gingn papié.
Mé kossa zot la fé don ? Zot la pa vol demoun ! Zot la pa mète an danzé la patri “des droits de l’Homme” ! Zot la pa fé krime sansa déli ! Zot lé solman dann kota demoun pou mète déor ! - pou lané 2007, la prévi in kota 25.000 pèrsone*.
Alor, kan la polis l’arivé, zot la pa rouv la porte. Le papa avèk lo zanfan la sèye sov par la fénète. Ivan la sort anlèr, la pète dann fon. Éstèr, li lé rant la vi épi la mor !
Somanké La Frans nora san tardé in klandéstin an moins, in klandéstin douz an solman. Somanké ni dira pi : kissa i lé Ivan Demski, mé kissa lété Ivan Dembski. Va parl dé li o passé !
25.000 moin inn i fé 24.999. La p’assé, mète ankor !

Justin