Jano l’avé troi kabri : in blan, in maron, in noir mé son bann kabri té pa réspéktyé pou li. In matin zot i rant dann in karo patat, zot i boulvèrs lo total é lo pov marmaye i ariv pa tir azot ladan. Li mont dsi in rosh épi li plèr. Moush a myèl i oi li lapré pléré épi i dmann kouk la éspasé. Li rakont son maléré sor é lo moush i di li lé kapab rézoud lo problèm, mé li domann kosa i done ali si li fé sa. Lo marmaye i di : sak ou i vé mi donn aou provi ké la pa tro shèr é ké lé pa tro difisil pou an avoir.
L’avé inn foi pou inn bone foi, mésyé lo foi, la manz son foi èk in grinnsèl !

Donk zot i tonm dakor é lo moush i rant dann karo patat. Li fons dsi lo shèv blan, li rant dann son zorèye. Li fé bzzzitt, bzzzitt, bzzzitt. Lo kabri i vien fou épi li kour déor li sar asir koté Jano. Mèm tarif pou lo kabri maron : inposib siport lo bziittt, bziittt, bzitt lo moush i fé séga dann trou d’zorèye. Kabri maron loumaye, li sort déor épi li asiz koté Jano. Tanka lo kabri blan, li atann pa son tour, li fons déor.
Kriké Mésyé ! Kraké Madam ! La klé dann mon posh ! la taye dann out sak !

Moush a myèl fini fé son travaye, i arvien koté Jano é li di : « Ou la bien di amoin ou i done amoin sak mi vé ?
- Si moin lé an kapasité Jano i di.
- Moush i di ali sinploman, moin la bézoin in pti kaz pou fé mon ni, épi fabrik mon myèl avèk tout mon bann dalon ;
- Sa la pa in problèm pou moin, moin néna zoutiy épi matéryèl, m’a fé sa pou ou. »
L’èrla, Jano i pran son tan, épi li fabrik in zoli kaz pou moush a myèl. Pou bann moush fé z’ot myèl, pou zot grandi z’ot larv, pou abrite z’ot bann solda épi z’ot bann zouvriyé san obliyé la rène, lo shèf la dan.
Moush bien kontan i di : « M’apèl ali rush é li sar la kaz bann moush a myèl é tout la kaz d’ot va fé v’apèl sa rush... Pou romèrsyé aou pou out zantiyté moin va fé done aou in réyon jenn myèl shak ané.
Dopi so tan-la kabri Jano la rofé. Zot lé réspéktyé astèr a kroir lo pti kou d’moush a myèl dann zorèye la ansèrv azot loson. Tanka Jano li anmank pa lo myèl ziska zordi. Zistoir Jano la fini, é mi pé dir la pa in zistoir mantèr pars moin la antann sa dann radyo [1].