Bann zour i pass inn apré l’ot. Partou, dann tout péi, lo pri lésans i diminié, lo pri gazole i dsann, lo pri lo gaz i bèss, étsétéré, étsétéra... baril pétrol, son koté, konm diré in gran komik, i dsann, i dsann, i dsann ziska talèr v’ariv o fon. Partou, san batay, san dispite, san ralé poussé, lo pri i ajust.

Partou ? In-In-In ! La pa partou... Dann Répiblik, néna fransé a par antièr, épi na sak lé antièrman a par. Promié kalitégori, ni koné oussa i lé. Dézièm kalitégori, sa bann zil, konm La Martinik, la Guadloup, épi La Rénion, nana ossi La Guiyane. Mèm Mayotte, banna la pa oz fé konm avèk nou.

Koman la fé don ? La komans par fé lantant avèk bann pétrolié déssi la boss bann antièrman a par. Anparmi la bann, nou la rèss atèr, plis a tèr ké lé zot. Zordi, nou mèm i péy bann produi-la pli shèr, é konm di lo kont, nana in pé i manz la laine déssi nout do. Kissa l’otèr ? Bann pétrolié bien sir, lo préfé galman, épi bann kriyèr d’nuit la anbar shemin.

Partou, lo pri i arète pa béssé, mé méssié lo Préfé, lo fiksatèr an shèf lo pri lésans, i pans li nana ankor le tan devan li. Demin i raz gratuit ! Demin le pri va béssé ! Demin ? Non, dann in moi ! Na in pé lé pa jéné, foutor !

Justin