Pepe Mujica, lété in om d’éta dann in péi l’amérik Latine i apèl l’Uruguay. Li lété sénatèr, minis, épi dopi 2010 ziska 2015 prézidan la répiblik. Mé avansa li la fé tout in parkour konm révolisyonèr dann mouvman Tupamaros. Arété, li la pass tout in tan konm otaz lo gouvèrnman dopi 1973 ziska 1985. Momandoné li té anfèrmé dann in pui. Normalman li téi doi mor avèk in trètman konmsa : li la konète la fain, la tortir mé li té tèlman for dann son tète ké li la nyabou rèss vivan.

Kan la diktatir lété fini, li la fé son prop parti la gingn zéléksyon avèk la gosh uni. Kan li lété sénatèr li la kontant ali avèk lo salèr minimom néna dann son péi azouté avèk son rovni konm pti fèrmyé. Aprésa li lété minis é li la kontinyé viv parèye. Kan li lété prézidan li la rofiz pass son tan dann palé prézidansyèl é li la rèss dann son pti fèrm. Li la tourn lo do avèk bann koktèl, Son trètman la ansèrv pou dépane bann pov. Lo palé prézidan la sèrv pou abrite bann pov kan zot té malad.

Laz la rotrète l’arivé Pepe Mujica la rofiz la rotrète prézidan, é li la kontant ali son rovni konm pti fèrmyé. Zordi ankor li viv dann son fèrm, avèk in pti loto Volkswwagen an abiz dsi son pèp.

Pou kosa mi anparl sa ? Pa pars mi konsidèr Pépé Mujica konm in modèl pou bann politisien koméla mé sinploman pars bonpé d’moun-zilé zone épi d’ot-i poz azot késtyon dsi lo salèr in om politik. Pou mon par, mi trouv néna in léspas rant Pépé Mujica épi bann zom politik La frans é mèm La Rényon. Néna in léspass rant sak i vé konm in vokasyon sèrv zot péi, épi sak i vé amenn la bèl vi, fé bann gran dépans, épi viv dan luks.

Si in zour, lété posib konète dann détaye koman désèrtin z’om politik la viv isi La Rényon dopi dé zané é dé zané, mi diré noré konm in goufr rant zot nivo d’vi épi sète Pépé Mujica é galman pou zot itilité, Mé sète-la dann sans kontrèr. Parèye pou lo nom zot va lèss dann listoir avèk zot fason okip azot bann zafèr na poin linportans dan la vi : bann fransé, dann zot lang azot, i diré zot billevesées…