La pa késtyon d’fé lo bilan la karyèr in gran méssyé konmsa mé ni pé dir Jugnauth konm d’ote gran zom politik lil Maurice l’avé poin pou rouji par raporte landroi nout voizine lété kan la déklar lindépandanss ziska landroi li lé zordi, zour son mortalité.

Si mi rapèl bien kossa bande éspésyalist té i di dann tan-la, mi rapèl zot lété pa optimist ditou par raporte l’avnir noute lil seur. Sak té i atande ali d’apré zot lété la guèr rante bande kominoté, la fayite ékonomik, la mizère é toute sorte kalité tablatir. Si tèlman ké Langlétère lété préssé donn lo péi lindépandans é la même done ali sa san fé in référandome.

Aprésa, lé vré la spass inn-dé pèryode difisil, mé koman-koman, lo péi la nyabou avanssé é toute rényoné i sava Maurice i konstate lo péi la bien avanssé. Maurice néna in métro, i sorte mèm anvoye in satélité dan léspass, néna plizyèr lékol sipèryèr, épi li la modèrnizé. Arzoute èk sa lo dékolaz ékonomik, indistriyèl , touristique.

Astèr si ni fé in raproshman avèk La Rényon, mi souvien lo tan pou rojète noute domande lotonomi, in pé téi di nou va manz lo rosh konm Morisien.Ni pé dir so bande moune la, la tronpé san pour san é Paul Vergès é toute bande zobsèrvatèr o nète, pli klèrvoiyan téi rokoné la réissite nout voizine é lo tan d’rotar ké nou la pran par raporte aèl.

In lindépandanss bien réissi.