Lobsèrvatoir bann pri ? Ala in nafèr -zénéral de gaulle noré di « un machin »- lété dann la LOOM (loi d’orientation pour l’outre-mer) dopi lané 2000. Kan bann dépité la gosh la propoz sa lété pou fé la transparence déssi bann pri. Aprésa la atann plis sink an pou mète le lobservatoire débout. Épi, konm ki diré, na déssèrtin i vé pa lelobsèrvatoir i obsèrv. Nana zafèr pou kashiété ? Sa lé sir mé kossa ? Sré t’i k’bann sosiété kolonial i abizré in pti pé ?

Nana in pé i vé la transparans : la prèv, bann farmasien la désid domann lobsèrvatoir agard in pé bann pri médikaman. Zis agardé, pa désidé, arienk pou oir si i abiz, sansa si i abiz pa. Solon lo préfé -rantre nou, konm di mon gran-mèr, in boug la pa kass kat pat in kanar !- la pa pou sa la fé lo lobsèrvatoir, juridikman !

A bon ? Bin alors, kissa i koné, lo zafèr juridikman ? Lo préfé i koné son tousèl. Li koné, mé lo minis la santé té i koné pa kan èl la vni issi, vi k’èl la bat aryèr kan bann farmasien la mète z’ot kont déssi la tab dovan èl. O fèt, na in késtion i vien dann mon tèt : an parlan par réspé, kouk i ansèrv in préfé k’i koné pa granshoz épi k’i vé pa tro konète ? Juridikman, biensir !

Justin