Mi sort lir dann journal in drol nouvèl. I paré lo prézidan sé in roi d’mantèr...tou lé ka, sé son ansien minis lékonomi k’i di sa. Li di konmsa lé pa posib an avoir konfyans dann Hollande pars li pass son tan à kalkil mantèr. Mantèr ? Sa in kalité, sa in défo ? Moin lé a d’mandé si dan la Frans lé pa in bon afèr ké kalkil mantèr é dann lo moun i fé la politik i diré lo mansonj sé in règ zénéral pou amenn la politik. Zot i koné lo provèrb : « promès sé dète ! », mé mi sipoz zot i koné osi lo kozman in onm politilk téi di : « In promès i angaz pa sak i fé lo promès, mé sak i kroi ! ». Alor, mé zami, ala in vré késtyon : kisa kroir dann la vi tou lé zour ? kisa kroir dann la vi piblik ? kisa kroir dann la vi politik ?

In n’ot késtyon i sava ansanm : koman détèk lo mantèr ? Koman détèk lo mansonj ? Na bien in pikir i apèl détéktèr mansonj, mé mi koné pa si i marsh… Mé sak mi koné, i pé pa trap in moun épi aplik ali in pikyèr pou konète si li manti sansa si li di la vérité. Sa lé défandi. Solman, konm moin la fine dir azot, na in provèrb bann z’alman i di konmsa : « Mansonz, la pate lé kourt ! ». Sa i vé dir, ou i manti zordi, ou i armanti domin, apré domin ou i sharj ankor d’lo, in bo zour i fini par trap aou. So zour-la, ou lé pri é bien pri, é pèrsone i kroi pi aou. Na mèm désèrtin moun la fine an avoir in répitasyonn mantèr é zot sé in lézann dann z’ot domène.

Mé, pou rotourn a la politik, mon papa té i di konmsa : « la droit-la, sa lé mantèr sa ! ». Zordi ni pé dir : « sosyalis-la, sa lé mantèr pou vréman ! » Pa tout biensir, mé désèrtin dirizan. Romark , mansonj, astèr in pé i apèl sa la kominikasyon. Si ou i koné lo poin sansib bann demoun nana sé l’androi fo ou i tak azot. Si ou i koné demoun i atann ou i di in n’afèr, ébin sé sa mèm ou i di é ou i sava pa dir azot in n’afèr zot i vé pa antann ditou. Moush i atrap èk myèl, i atrap pa avèk vinèg. Si ou i di demoun li sa transpiré, li sa transpiré, pou gingn près pa arien, ou lé sir out pyèz i marsh ar pa. Si ou i promète ali bone shoz é si domin la pilil lé amèr, i fé arien provik ou la fine gingn out plas prézidan, sansa in n’ot pla inportan...

Mé sa lé pa moral ! Sa sé in n’afèr k’i fo pa fèr ! Moin lé a d’mandé si sa la pa in péshé kapital é ki di péshé kapital i di l’anfèr a pèrpétuité. Tout o moin la fin out karyèr !

NB in kozman pou la rout : « L’anfèr lé pavé avèk bon z’intansion ! ». Mi diré plito, li lé pavé avèk mové z’intansion é mové z’aksion… Mé si bann bon z’intansion i abouti pa, si ou di ou na bon projé é si ou i fé arienk mové z’afèr lé posib ou i artrouv aou dann l’anfèr. In légzanp ? Tienbo pa out promès : ala in mové laksion é nana va griyé dann l’anfèr pou sa. Sansa na in pé i amont ar pi zot gfigir pou in vote.