I paré dann in péi i apèl l’Afrique du Sud nana in bèl zoizo i apèl l’otrush : zoizo la i koné pa volé, mé li koné kourir, épi d’apré sak demoun i di, li lof, li mèt devan, li fish, li bour lo fèr, li manj zaran. Solman, kan li la fine kour in bon bout tan, kan li konpran bann shien sovaz i sava souk ali, li larg le kor, li bour son tèt dann trou galé... li bouj pi... Lèr-la li lé fouti... L’èr-la bann shien sovaz i manz ali par déyèr.

Na in kozman fransé i parl « la politik l’otrush » : in manièr fèr san tienbo kont lé konsékans sak ou i fé, i pé an avoir pou demin.

Sa in bon patoi pou sak i éspas dovan nout zié... kan méssié Préfé i kroiz le doi konm in marmay pini koté sindika transportèr, épi le boug i di li sava blok lékonomi, li va karsèr La Réjion, méssié Préfé i bat pa la min, mé lé konm si ! Pli pir, konm di le patoi, li kriy avèk bann loup vik li donn tor inn, donn rézon l’ot, san sousié pou sak lé riskab arivé... Li di mèmm si nana in dézord, li gingn ar pa fèr fas, épi anvoy bann fors la polis pars sa la pa son manièr fèr. A bon ? Donk i pé ariv ninport de koué, alor ?

Méssié Préfé, kontinié bour out tèt dann galé. Sé kan la mèr lé démonté k’i oi kapitènn bandé, k’i oi ossi bann marin “d’eau douce”. Fransh vérité !

Justin