In zistoir rant ti marmaye lékol. La métrès lékol i domann in pti fiy, pou kosa in n’ot lé an kolèr konmsa. Lo pti fiy i réponn : « moin la kass mon mine kréyon, pétète sa la rann aèl bandé » . Sa i vé dir souvan défoi lé difisil ésplik kon potman désèrtin moun é la pa lo viktime pou vréman i kriy pli for kan i ariv kékshoz. Astèr si ni arvien dsi nout kozman anlèr la sa i rapèl anou in kozman konm : « Z’inosan i pèye pou koupab ! ». Konbien foi sa l’ariv anou étan pti. Mi souvien kan moin téi par katéshis, bann mamèr – bann rolijyèz si zot i vé !- la mète anou pini, pars in marmaye la vol in zépi mayi. A partir d’zour-la, mi pé dir azot moin la pi port bann mamère dann mon kèr. Alé ! mi kite azot pou rofléshi la dsi é ni artrouv pli d’van. Sipétadyé !