Ala éstèr Johnny i vé alé rès la Suisse akoz li inm la kanpagn, épi an Frans i pèy tro z’inpo. Li di mem, Sarkozy lé dakor ansanm lï. Konmsa, bann fransé va rann azot kont par zot mem, pèy in bon pé z’inpo la pa in bon zafèr. Solman, mon bann dalon, boug-la la pa désid alé ninport ou, li la désid alé Gstaad. La-ba nana in pist pou fé l’éski épi in pist pou fé motocross. Epi na bon moun, bien distingé ; in pé mem nana san blé : i prétan la famiy de Savoie i vien la-ba pou pass vakans.

Sarkozy la di sé le droi Johnny vik sé son larzan. Kosa nou pé armèt la dsï nou ? sansa rapèl lo provèrb : "mèt in bourik atlé avèk in kalèsh, li pran ali pou in shoval". Sof, son larzan, li rak sa dann posh bann moun i ginye pa bon pé, i vé zis rèv in pé. Sof nana z’inpo an Suisse, solman napoin do koi fé tonm bann rish kriz lapoplèksi. Sof partou i pèy pa z’inpo parèy : nana zinpo par komine, par kanton épi nana z’inpo fédéral, sak par komine épi par kanton i tap pli for k’z’inpo fédéral. In n’ot afèr : lo mèr dann shak komine nana lo droi bès z’inpo kominal. Nana in pé i fé, nana in péi fé pa. Lo mèr landroi li fé sa, pou bann rish i vien la-ba, épili rofîz pa zot arien* : la rout li, la pist l’éski li, komèrs pou miliardèr li.

Ala in boug va kout pli shèr k’ sak li va raporté. Bann suiss sar kontan avèk li ! Dizon, sar in kado anpoizoné pou banna. Sarkozy, sar kontan, galman : sa in boomerang** pou lï. Tansion rotour !

Justin

*journal "le temps"du 21/12/06
**bomoorang : arme des aborigènes australiens qui revient à son point de départ et blesse le chasseur maladroit.

- le conseil municipal de Saanen,commune qui comprend le havre pour riches Gstaad se compose d’élus de la droite conservatrice libérale(FDP) et d’élus d’extrême droite(SVP)