Milé kosa i lé ? Sé in kroizé shoval avèk bourik. Pé s’fèr la zénérasyon koméla i koné pa milé amoins dann télé, amoins dann péi déor. Mé mi rapèl oparavan l’avé milé pou tir karyol : kisoi karyol do lé, kisoi karyol pou transport paké. In pé l’avé in gran posh sou la ké donk téi ramas lo krotin pou fé fimyé. In pé téi mète pa arien épi lo kaka téi tonm dann shomin. Zoizo té i fé son féstin. Donk té i lès pa arien gaté. Lété konm i di in l’ékonomi dirab kisoi par la volonté d’moun, kisoi par la natir.

I paré Lavoizier in gran savan, dann tan lontan, téi di : « Na arien k’i s’pèrd, na arien k’i s’kré ». Antansyon la vérité i pé an avoir plizyèr koulèr : sak té vré yèr lé pa forsé k’lé vré zordi.

Kosa zot i anpans ? Arien ditou ! Fé travay z’ot koko ! Fé bouy z’ot matyèr griz ! Zot va oir ké, rant-rant, ni pé z’ète, tazantan, dakor rantre nou.