Mézami zistoir-la téi éspass dann tan zanimo l’avé la parol. Zot toute téi rèst dann in roiyome é si mi tronpe pa lo Roi té lo lion – i di pa lo lion sé lo Roi bande zanimo ?

Dann roiyome-la toute téi roul ron konm i pé roul ron dann in roiyome zanimo. – tazantan in pti ralé-poussé mé vitman, vitman lo roi téi ramenn l’ord épi la pé. Sof k’in zour dolo l’ariv a manké. L’avé bien in sours téi dévèrs son lo zour é nuite dann in gran rézèrvoir natirèl, mé la sours té sèk épi dann rézèrvoir-in sinp bassin – l’avé dann fon in pé d’lo farfouyé, plizoumoins mélanzé èk la bou.

Toute zanimo i sava s’anplègn avèk lo Roi é i di ali vik ou sé lo Roi, i fo wi trouv dolo pou nou. Manzé i pé s’anpass inn-dé zour, mé d’lo ? inpossib s’an passé.

Kriké ! kraké ! Kriké Madam ! Kraké Méssyé !

Lo roi la konvoke bande zanimo – son sizé téi di sa, dann tan-la. Toute la komanss diskité dsi lo méyèr moiyin pou trouv dolo. In diskission san fin.ziska ké lo Roi la di : « i fo inn pou alé oir Bondyé. Li tousèl i pé tire anou dann l’annuiman ».

Troi volontèr i done zot nom pou alé : shoval, bèf épi tortu. Kan tortu la porte volontèr toute zanimo la pète a rir. Lo roi ossi li la pans sa la pa sèryé, é li la di :

« Shoval v’alé pars shoval i kour pli vite toulézot ! ». Shoval la di : « Oui mon Roi ! »

Pakatof ! Pakatof ! Shoval la lanssé. Li koné shomin é in néstan li v’arivé. Dann tan-la bondyé l’avé son kaze dann koin in gro niyaz.

Shoval i ariv, li kongn dsi la porte Bondyé. Bang ! Bang ! Bang ! iiiiiiiiiiii Bondyé i vien rouv la porte. Li domande : « kossa l’arivé pou déranze amwin konmsa ? » Shoval i fé pou réponss : « Bondyé ségnèr roi di monde é dé la tère, oute pèp l’apré mor afors na poin d’lo. Lo roi la di amwin alé domande aou. ». Bondyé i grate in pé déyèr son tète épi i di : « Alé ! Rode in gran pyé kalandiyak, fouye in gran trou é dolo v’arivé. Solman di toute rèst pa dovan pars lo kouran lé riskab noiye in pé ». Shoval lé kontan lot répons é li komanss la déssante. Pakatof ! pakatof ! iiiiiiiiiiiii

Koton mayi i koul ! rosh i flote ! l’avé inn foi pou inn bone foi… Promyé morso lé fini. Astèr dézyèm morso i komans.

Justin

NB Promyé foi mwin la lire zistoir-la lété dann in rovi téi apèl « Bardzour Maskarin » é sak l’avé ramass zistoir-la lété Boris Gamaleya. In gran kiltiré la lang kréol.