L’avé inn foi pou inn bone foi, méssyé lo foi la manze son foi èk in grin d’sèl.

Mézami konm zot i rapèl dolo l’ariv a manké dann roiyome zanimo é lo roi la anvoye shoval oir Bondyé pou konète koman i fo fé pou an avoir d’lo.

Bondyé la di : i fo rode in gro pyé Kalandiyak, fouye in bon profondèr épi va gingn dolo an kantité. Shoval i déssande é li répète pou pa obliyé : « Kalandiayk ! Yak ! Kalandiyak ! Yak ! Li trass an d’sandan. Pakatof ! Pakatof ! IIIIII. Zot i konpran lo roi l’anvoye ali an mission é kan ou sé in bon sizé é ké pètète wi aspère in rékonpanss wi fé lo vif – dilizanss in pé va di sa !

In néstan shoval v’arivé.. In néstan ? Mé oila, dann in tournan sèk, l’avé in flèr koussin vèr kèr blé épi in lodèr mi rakone pa zot koman sa téi san bon é koman sa i doizète bon. Shoval i di : « Lé vré mwin la poin lo tran pou pèrde mé in kou d’lang épi mi ral ali dann mon guèl épizapré dann in posh léstoma. Apré m’a pran lo tan pou mashé ». Shoval lé riminan sa non ? Antouléka li raprosh, épi d’in kou d’lang, d’in sèl, li aval lo koussin vèr kèr blé. Inn bonté inkroiyab.

Shoval i kol shomin an dsan dan : Pakatof ! Pakatof ! IIIIIII épi liaksélère an dsandan. I tarde pa li ariv. Mé oila, lo hik ! Lo problème konm i pé ariv aou, konm ariv amwin : in aksidan la mémoir é shoval i rapèl pi lo mo li t’apré répété.

A ! Toudinkou lo mo i rovien : Takamaka ! Antouléka sé sak shoval i pans. Takamaka, sa lé dann son tète épi li répète, li répète, li arpète, li arpète.

Kriké ! kraké ! Kriké Madam ! Kraké Méssyé !

Bande zanimo i rassanb é lo roi i domande kossa Bondyé la di. Shoval i fé pou répons : « Bondyé la di fouye in trou koté in gro pyé Takamaka, é dolo v’arivé an kantité ».. épi li azoute : « Antansyon, rèss pa tro pré pars dolo lé riskab noiye azot ! »

Lo Roi i done lé zorde pou fouyé : « Zanimo i fouye. ; I fouye, i fouye mèm, mé san trouv arien ! ». Bande zanimo déssu i sava zot kaze é lo roi i di : « Bèf ! alé oute tour lav bien oute zorèye pou antande sak bondyé va di ! »

Koton mayi i koul ! rodsh i flote ! L’avé inn foi pou inn bone foi… Dézyèm morso lé fini. Astèr troizyèm morso i komans.

Justin