L’avé inn foi pou inn bone foi, méssyé lo foi la manze son foi èk in grin d’sèl.

Mi rapèl azot shoval la éshoué dann son mission alé domande Bondyé koman i fé pou gingn dolo. Mé lo roi i désside, toutesuite pou toutesuite bèf v’alé.

Bèf i fish an montan : Pouf ! Pouf ! Pouf ! Pouf ! Man-an-an. Li kour pa vitman konm shoval mé li néna son gou d’sèl li ossi. Ala ké li ariv dovan la porte Bondyé. Li bate dsi la porte : Bang-bang-bang ! Bang ! Man-an-an-an

Bondyé i ariv é toute suite li di : « Kossa l’arivé ankor ? La pa gingn dolo dann roiyome an-ba ? Shoval zorèye té boushé ? Li la pa antande mwin la di fouye koté in gro pyé kalandiyak épi va trouv dolo an kantité ? Bèf i lanss an dsandan. Li répète, li répète, li arpète, li arpète :

Kalandiyak ! Yak ! Kalandiyak ! Yak !

I fo oir koman li fish an dsandan. In néstan li v’ariv an-ba. In néstan ! Mé oila k’in zoli flèr koussin vèr kèr blé i fé lo bèf dé zavans :

« Vien bèf ! vien aou ! Mwin lé zoli, mwin lé blé, mwin lé vèr ! Mwin é bon vien manze amwin. »

In kou d’lang rapante, in sèl é bèf i aval pti koussin vèr kèr blé é li tarde pa li sava. Li anvoye sa dann in posh léstoma an panssan : « Apré m’a manze ali ! »Toute lé Ok ! Toute ?

Kriké ! Kraké ! Kriké Méssyé ! Kraké Madame !

Sof in n’afèr ! Li trouv pi lo nom bondyé la di ali, obliye pa. Mé toudinkou li rapèl’takamaka ! Takamaka ! ». Li la rotrouvé ! Antouléka, li panss li la rotrouvé.

Ala li ropran la déssante : Pouf ! Pouf ! Pouf ! Pouf ! Man-an-an-an é in pé d’tan apré li ariv. Lo Roi i akèye ali, éi domande ali kossa Bondyé la di. Li réponde : « Bondyé la di : fouye in gran trou koté lo pyé takamaka é dolo v’ariv a flo »

Ala ké zot i sava koté in n’ote gro pyé takamaka épi i fouye, i fouye, i fouye mèm. Mé i trouv pa arien. Pwin d’lo ! Lo roi lé dékourazé, li di : « Kant mèm, Bondyé i pé paf ère anou in n’afèr konmsa ! ». Toute bande zanimo zot ossi lé dékourazé, mé lo rpoi i ropran favèr éî di :

« Tortu alé aou ! Alé oir Bondyé ! Noute sèl léspoir i ropoze dsi ou ! ».

Koton mayi i koul ! Rodsh i flote ! L’avé inn foi pou inn bone foi… troizyèm morso lé fini. Astèr katrizyèm i komans.

Justin