L’avé inn foi pou inn bone foi, méssyé lo foi la manze son foi èk in grin d’sèl.

Bèf la éshoué dann son mission. Alala pou kossa Bondyé i anvoye tortu an mission pou domande Bondyé koman i fo fé pou gingn dolo.

Ala tortu i ariv dovan la porte bondyé : Tak ! Tak ! Tak épi li frote son mizo dsi lo ba d’porte : « Tikrak ! Tikrak ! Tikrak ! »

Bondyé i ariv épi li di dann li mèm : « kossa i lé ankor sa ? » Tortu i pran son tan pou li ésplik bondyé : « Mi vien pou la késtyonn lo ! » é Bondyé i rodi sak i fo fé. Tortu kontan ardéssande.

« Kok kolok, kok kolok ! » épi tortu i répète dann son tète : « Kalandiyak, yak ! Kalandiyak ! ». Toute i marsh bien ! Toute i marsh bien !

Kriké ! Kraké ! Kriké Méssyé ! Kraké Madam !

Toudinkou dann in viraz anglé droi, tortu i oi in zoli flère, koussin vèr, kèr blé ki fé sign ali : « Tortu vien aou, mwin lé zoli, mi san bon épi mwin lé bon, toulbon. Vien aou ! »

Mé tortu i ékoute pa arien, li antande pa arien li déssande mèm é dann son tète li répète, li répète, li arpète, li arpète : « Kalandiyak ! Yak ! Kalandiyak ! Yak. ».

Gro nui noir tortu i ariv dann roiyom. Prèss toulmoune la tète i kante avèk somèye sof lo roi, droite konm in roi dann zé d’karte. Li di èk tortu : « Kossa Bondyé la di aou ? ». Tortu i ésplike i fo fouye in gran trou koté in gro pyé kalandiyak dolo v’arivé. Mé antansyon, rèst pa tro pré sansa lo kouran v’alé avèk zot.

Dë zanimo i fouye épi momandoné san fouye tro o fon, dolo i débark an toran. Bande zanimo na ziss lo tan pou évité é oila ké dolo ranpli lo rézèrvoir é bande zanimo i bate la min. Toute i boir shakinn in pé : in bon lo mézami... konm dolo la fontaine Madame Toutou dann Boi d’nèf Sin-Dni Lo an boutèye sé arien a koté. Toute zanimo i fé la fète pou tortu. Talèr i porte ali an triomphe. Toulmoune i réspire : in ta zour san lo sa i fatig oui sa.

Katriyèm morso lé fini. San tardé ni sava rakonte lo dézyèm épizode ni pé apèl : Tortu la sazèsse é Lyèv lo rodomon.

Koton mayi i koul ! rosh i flote ! l’avé inn foi pou inn bone foi… katriyèm morso lé fini.

Justin