Mézami nou lé souvan okipé pou domandé, si nou lé méyèr sansa pli mové ké sak la vni avan nou. Nou lé a d’mandé galman si noute déssandanss sar méyèr osinonsa pli pir ké nou. Sé in késtyon d’natir mé galman in késtyon d’kiltir.

Ni pé débate la dsu ziska la fin dé fin san trouv in bon solission. Biensi ni pé dir si ni plante bande grin kalbass amèr, lé prèss sir ké nou nora kalbass amèr-in késtyon d’érédité. Mé pour la natir imène la pa lo mèm zafèr.

Pou kossa ? Pars i fo toute in vilaz pou élèv in zanfan donk toute sak lé dann ou, la pa noute famiye solman ké la done anou. Nou la pran ossi avèk noute bande voizin, lo moune étranj épi d’ote é d’ote é d’ote ankor. Ala ki obliz a nou rofléshir san z’ète sir trouv in rézilta san pour san ok.

Alé ! Mi kite azot rofléshi la dsu é ni rotrouv pli d’van. Sipétadyé.

Justin