Madame, Méssyé, la sosyété, koz èk mwin sé koz èk in kouyon mé sé o pyé d’lo mir k’i oi lo masson. Mézami, mwin lé sir zot i koné kozman-la kissoi dann la lang franssé, kissoi dann la lang kréol, kissoi dann d’ote lang ankor. Dann la lang franssé i di pa : « Tèl papa tèl zanfan » ? Antouléka sa i vé dir mèm si ou lé mové, si ou néna pliss viss ké l’izine bofon,final de konte wi suiv la famiye donk sa i dédouane aou in pé si ou la fé in n’afère lé pa tèlman rokomandab. Néna défoi, wi suiv pa oute rassine famiye, mèm wi pran in n’ot shomin. Sé konmsa ké dann la lang fransé wi pé trouv in provèrb pou di lo kontrèr par raporte sète mwin la mark an-o la,konm « Papa pirate, zanfan dépansyé. » -Dann la lang kréol rényonèz mi koné pa in kozman konmsa mé mi panss néna sirman pars konm mi di souvan in provèrb i pé di « A » é l’ote dann mèm lang di « B » ; inn i di dou l’otei di amère. Alé ! mi kite azot rofléshi la dsi é ni artrouv pli d’van. Sipétadyé.