Nana in radio mi ékout toultan, akoz i aprann dé shoz dann radio-la. La pa pou kass ti-boi, la pa pou gougnardé, la pa non pli pou nargué, mé sinpleman pou dir in n’afèr lé vré. Bann z’animatèr lé vayan, bann z’invité lé fantézi, in bann savan prèsk ! Zot i koné pou kossa lé gayar akout in moun savan ? Sé k’apré, ou na linpréssion, ou lé moin boushé. Fransh vérité !
Donk moin lété apré ékout in madam koz ansanm in éspésialis lo kafé. Oté ! Boug-la té i koné d’zafèr déssi bann kalité kafé, déssi z’ot plantasion, déssi la manièr ramassé, déssi la manièr préparé, étsétéra-étsétéra-la ké lo ra. A moin té i boir ti-lé si tèlman boug-la té apré rann amoin intélizans.
Solman, ala k’in farsèr, i trouv moiyin domann lo boug si li koné kafé bourbon pointi La Rénion. Lo boug la réponn, takotak, sa in kafé, lo pié lé pa konm lo pié kafé, épi i donn pti-pti grin pointi dé koté. Li anshèv dir : sa i plante la Nouvelle Calédonie, épi la Guadeloupe, i komans zis planté La Rénion
Alor la, moin la rèss bète, moin la mazine si tout sak li di lé vré konmsa, li sharoye arienk la kouyonis, li ramass solman mantèr, li fé pran anou po d’shanm pou pla kouvèr la prézantatris la di : « ah ! Vous avez réponse à tout ! » Moin mi pans kalité répons konm sa i pé s’an passé ! Fransh vérité !

Justin