Matant Zélida la ékrir Justi :
Mon shèr nové, mon spès salté,
Mi sort antann dir méssyé Chatel, minis l’édikasyon, la déside rodonn favèr lo kalkil mantal. Moin lété kontan aprann in nouvèl konmsa. Pou kossa ? Pars kan moin lété lékol, nana pli lontan ké lontan, sa té in n’afèr moin té i èm. Nout mètrès lékol té i fé dis minite kalkil mantal tou lé zour shak zour. Fransh vérité, té in bon légzèrsis pou fé travay léspri marmay. Mi pans va fé d’bien bann marmay lékol plito zot l’apré fé travay zot doi, avèk manète, tablète é konpagni. Bien antandi, bann rouj-de-fon va dir i mank moiyin pou fé sa, olèrk aplik tik-tak gouvèrnman k’i di na moiyin fé myé avèk moins. Tok ! Pran sa pou toi !

Justin la fé pou répons :
Mon vyé matant k’i koz la boush rouvèr,
M’a dir aou, fransh vérité, konm di lo kont : « Dé kouyon i fé pa in savan ». Mé kant ou i antann bann amontrèr parlé sansa kan ou i lir sak zot i ékri, i fo ou i pôz aou késtyon ; Dabor, pou fé kalkil mantal, i fo ou i nyabou konète lo tik-tak lé kat z’opérasyon, é si ou i koné pa, ala ankor in travay i sava kraz aou, alé oir va done ankor plis la valèr sak lé for : li va fé son mal-dind.
Banna i di ossi, olèrk sinplifyé, l’apré lourdi in program déza tro lour, san k’lédikasyon nasyonal nana lo moiyin k’i fo. Moins bidzé, moins amontrèr, moins shèrshèr, plis marmay, é lé shoz va marsh myé ? Alé matant, i fo gouvèrnman i arète fé pran anou makaroni pou la bouji. Kant in minis i vien fé l’intéréssan dann télé, déssi l’anglé pou bann marmay troizan, déssi lo kalkil mantal é d’ote shoz ankor, mi trouv i vo myé li fèrm in kou son také, pars konm di mon défin granmèr, son kalkil mantal va fini an kalkil mantèr.

Justin